Fonê Hetkarîya Domanan yê Milletê Yewbîyayeyî (UNÎCEF) roja sêşeme raporê 2017î aşkere kerd. Goreyê raporî par pêro pîya 6 mîlyon 300 domanê ke emrê înan 15 ra şenikêr î, merdî. Rapor ra dîyar beno ke zafaneyê nê domanan 5 serreyî ra şenikêr î.
Rapor de ca dîyayo şertê ke domanî tede cuyenî zî. Şertê ke domanî tede cuyenî, goreyê 20 serrî verê hîna zehmetin û tehlukeyin î. Goreyê raporî hûmara domanê ke şonî mekteb her ke şona kêmî bena û domanê ke şîddet vînenî hûmara înan zêde bena.
Îdarekarê Beşê Dane, Cigêrayîş û Polîtîka yê UNÎCEFî Laurence Chandyî va ‘eke tedbîrî nêrî girewtene, beno ke heta 2030î 56 mîlyon domanî bimirî’ û wina dewam kerd: “Nîmeyê nê domanan zî bebekê ke newe welidîyenî yî. Bi derman, awa pake, cereyan û aşî eşkîyeno vernîya mergan bêro girewtene.”
Tewr zaf domanî Afrîka de merdî
Goreyê raporî şansê cuyayîşê domanan tewr tay Somalî, Çad û Komara Afrîkaya Mîyanên de yo. Nê cayan de her 8 domanan ra yew heta panc serrîya xo nêcuyeno. Eke merdim bido têver, Almanya de no nîsbet 250 domanan ra yew de yeno dîyayene.
MERKEZÊ XEBERAN