Bimbarekîna ke Meydanê Sey Riza de viraziya, Hemserokê HDP Selahattîn Demîrtaş, Qiseykerdoxa HDK Gulîstan Koçyîgît û Seroka EMEP Selma Gurkan, Parlamenterê HDP yê sûk Alîcan Onlu, hemşaredarê sûk ra piya xêlê siyasetmedarî tewr bî. Gûlîstan Koçyîgît qiseyê sifte kerd û da zonayen ke, rexmê pêrokîn zext û qetlîaman Dersim tekoşîn û sarewedarnayen ra fek nêverda. Koçyîgît ard ziwan ke, zey vizêr ma ewro kî nêtersenê û va: “Yê ke ma ra teslîmiyet wazenê, ser Farqîn, Sûr, Nisêbîn, Cizîr ma dê vera tanq, tifing û topanê şima xover bidê. Eke ferman yê padîşahî bo, meydanî yê ma yê. Koçyîgît hayr ant ‘qedexe’ yê Newroz yê dewlet ser û va, Newroz Dersimijan rê nêbena qedexe, wa no kî şima rê dert bo, ders bo.
Newroz omidê haştî yo
Seroka EMEP Selma Gurkan kî xîtabê Dersimijan kerd û ard zon ke, nêşkenê verniya îradeyê şarî de tometan ronê. Gurkan da zonayen ke, ser hometan zilm esto, qetlîamî estê û niya va: “Ronayenê Tirkiyeya demoktarîk destê ma de yo. Ma dê 8ê Adar ra heta Newroz, Newroz ra heta 1ê Gulan tekoşîn bikerê. Şima vizêr nêşa ma, ewro zî nêşenê û şima dê meşt kî nêşerê.” Badê Gurkan Hemserokê HDP Selahattîn Demîrtaş vejya ser sehne. Demîrtaş’î va, tewr jêde kî Dersimijî fehm kenê ke ma çitûr rozanê zehmet ra vîrenê ra. Selahattîn Demîrtaş’î vist vîrî ke seweta ke kurdî wazenê bi zon, kultur, vîrardenê xo, ser welatê xo de bicuwyê nî felaketan kenê.
Demîrtaş’î ard ziwan ke, Newroza 2013î de adirê Newroz bi omidê haştî wekerdiyayî û niya va: “Ma zonê xo ra, îtiqatê xo ra, îdeolojî û tekoşîna xo ra nêşkeme feragat bikerime. Yê ke wayrê zihnîyetê serdestî yê ganî peyser gam bierzê. Demîrtaş’î hayr ant ‘qedexe’ yê Newroz ser û aşkere kerd ke Newroz milkê walî û Werîrê Karê Zerî niya. Hemserokê HDP vist vîrî ke Erdogan, kesê ke hetkarê ci niyê, ci rê îtaat nêkenê zey dişmenî vîneno. Demîrtaş’î hayr ant biyakariya hikûmeta AKP û DAIŞ ser û niya va: Rejîmê Enqera kî zey raybazanê DAIŞ nezdî beno. Yê ke desteg danê El-Nusra, Ehrar El Şam AKP bi xo ya. Nika jû dewleta ke wazena pêrokîn civakî teslîm bigîro esta.
Teslîmbiyayiş çinyo
Hemserokê HDP Demîrtaş’î ard ziwan ke, dewlet bi tepiştiş înan tehdît kena û niya va: “Ma dê heta peynî xover bide. Nêşkenê riyê ma de ters bivînê. Ma dê haştî û xoverdayiş ra ti wext tawiz nê dê, teslîmê faşîzm nêbê. Yê ke gune bitersê, faşîztî, zûrkerî bi xo yê”. Selahattîn Demîrtaş’î da zonayen ke, Spartakus ra heta na het tim û tim xoverderî serkewtî û hayr ant polîtîkayanê vera alewiyan ser. Demîrtaş’î va, alewiyan rê alewitiya AKP’yî ferz kenê û niya va: “Vanê ma dê bi qirkerdişê alewiyanê Dersim, Koçgîrî, Çorûm înan biyarê ra. Çiyo ke Enstîtu û diyanet kenê çiyê ke şerm çanê yê. Demîrtaş’î peynî de mesajê berzkerdişê xoverdayen da û ard ziwan ke, gune zere û teberê welatî de dest bide yewbînî.
Badê qiseyan bimbarekînê Newroz bi sloganan qediya.
DÎHA/DERSIM