Her çalakîye de tewr vernî de ya: Dayîka Xemê

AYŞE SURME / MA / WAN

Vera xespbîyayîşê şaredarîyan û tayînbîyayîşê qayûman de çalakîyê Kurdan roja 27. de dewam kenî. Bitaybetî Amed, Wan û Mêrdîn de û sewbîna xeylê cayanê bînan de çalakîya nobeta demokrasî yan girewtene û çalakgêrî hewl danî vengê xo bidî eşnawitene.

Çalakgêran ra yewe zî dayîka Xemê ya 80 serrî ya. Na dayîke dewa Pîrosa ya Bêşebabî ya Şirnexî ra ya. Dayîka Xemê zextan ver ewil koçê Gever, dima ra zî koçê Wanî kena. Dayîka Xemê dîyar kena ke aye vera bêhuqûqîyan de bi serran o ke têkoşîn dana û wina dewam kerde: “Seba ke ma Kurd bîy, destûr nêdîya ke ma erde xo ser o bimanî. Şewe bi sîlehan ameyênê keyeyê ma û înan ma tepiştê. Kişîyayîşê merdimanê ma, talanbîyayîşê keyeyanê ma hîna zî çimanê mi ver ro nêşonî.”

Dayîka Xemê herçiqas ke nêweş a zî, beşdarê heme çalakîyan bena. Dayîka Xemê dana zanayene ke heta nika 2 reyî ameya tepiştene û 2 rojî ez tepişte menda. Dayîke va ‘ê se bikerî zî ez fek têkoşînî ra veranêdana’ û wina domnaye: “Nika zî qayûmî ameyî tayînkerdene. Ma senî ke reya ewile qebul nêkerde, ma nika zî qebul nêkenî. No şar qayûman nêwazeno. Ma xespbîyayîşê şaredarîyan qebul nêkenî. Ma verê cû bi hawayo asan şîyêne şaredarîyan. Şaredarîyan ma goşdarî kerdêne û problemanê ma çareser kerdêne. Labelê ameyîşê qayûman ra nata kes nêşêno şaredarîyan. Wa êdî veradî ma nefes bigîrî. Wa fek ma ra verabidî. Ez bawer kena ke eke ma têkoşîn bidî, qayûmî do şêrî.”