Her çî aye dest dero. Pêro merdîs ra AKP sermiyan a .
Verecoy siyasetvanê tirkî, dima rojnamevanê tirkî, dima keso ke verva polîtîka dewleta xo ya nijadpereste û faşîste pêronêdano, nî pêro sermiyan ê.
Nî rozanê peyenan de onca "dewlet û milet“ biyê jû, verva Kurdan.
Cirê manê biyo pêda. Sawoke mesela bi Dîlok dest kerdo ci, sawoke ora avê her ca cennet, her çî azad bî.
Seweta hukumatê AKP, faşîst û nijadperestan asmên ra ke astare xişt bî, cira PKK sermiyan a.
Roze ra avê se biyo, era xo vîrî nêanê.
8 asmî Roboskî ser ra vêrdî ra, dewleta qetilkare hona kam, fermanê qetilkerdena 34 domonanê kurdî kam do, eskera nêkerdo û hen oseno ke nêwazena eskera kero.
Hama cayede ke teqayîsê bî, hukumat, rojnamevan, dewlet û milet benê jû, deqe ra tepiya pêropiya vanê: PKK.
Sonê desinde tayê însanan pêcenê, vanê: nînan kerdo. Kistene û qetilkerdene bingê felsefa hukumat û dewleta tirkî de estê.
Ser û sevevê merdena însanan, nî 10 serranê peyenan de hukumatê AKP wo.
Ser û sevevê merdena însanan, rojnamevan û roştberê ke 10 serriyo poşt danê AKP, î yê.
Dîlok de kam se kerd, hona zelal nêbiyo. Hama çiye endî biyo eskera. AKP merdena nî însanan rê raye kerde ra.
Hereme de ajanê xêle dugelan cîrte erzenê. Her dugele dezgê xo no ro, "kar û gurê“ xo kena.
AKP dostê xo silayiye kerdî, dostanê AKP zî ajan majanê xo rusnayî.
Dewleta AKP û vinetîsê qomê tirkî, ciranê dormê Tirkiye cirê kerdî dismen. AKP taye heremî kerdî jê Lubnan.
Kurdî, Tirkan jê dismen nêvînenê. Qomê Roboskî, rixmê honde dezanê xo, eskeranê ke qeza kerd bî, çitur cirê wayîr vejiya, numunewode en zelal o. Hama qomê tirkî û dewleta xo naye nêvînenê, kunê virara NATO domonanê kurdî kisenê, Kurdan tertele kenê.
***
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.