Sersefîrê Anqara yê Rûsya Adrey Karlov beşdarê sergîyêk bîbî û ewja de netîceyê suîkastê polîsê tirkan Mevlut Mert Altintaşo ke Mudurîya Asayîşî ya Anqara de wezîfedar bî, de ame kiştiş. Tesîrê kişîyayîşê sersefîrî hîna zî dewam keno.
Babete ser o Parlamenterê HDPyî yê Îzmîrî Ertugrul Kurkçuyî keyepelê xo yê medyaya komelkî ser o îzehet da. Kurkçuyî keyepelê xo ser ro wina vato: “Yew wextî Anqara de… Gelo her keso ke vajo ‘PKK rêxistinêk yê terorî nîyo’ do peynî de bêro kiştiş?”
Ma wina nêvînenî
Nê mesajê Kurkçuyî vatişê Sersefîrê Anqara yê Rûsya Andrey Karlovî ke serra 2015 de aşma teşrîna verêne de vatbî ard vîrî. Karlovî o wext ajansê Rîa Novostî rê qisey kerdbî û derheqê operasyonê Sûrîye yê Rûsya de qisey kerdbî û roportajê xo de vatbî ‘Ma PKKyî sey rêxistinêk yê terorî nêvînenî.’
14 aşmî ra dima ame kiştiş
Karlovo ke vatbî ‘ma PKKyî sey rêxistinêk yê terorî nêvînenî’ 14 aşmî ra dima hetê polîs Mevlut Mert Altintaşo ke Mudurîya Asayîşî ya Anqara de wezîfedar bî, ra ame kiştiş. Keso bîn ke Kurkçu mesajê xo de qala ci keno, Serekê Baroya Amedî Tahîr Elçî yo. Elçî zî semedo ke Televîzyonê CNNî de programê Ahmet Hakanî de qisey kerdbî û sey sersefîrî vatbî ‘PKK rêxistinêk yê terorî nîyo’ û 45 rojî dima ra amebî kiştiş. Her di cînayetan de çîyo ke bala merdimî anceno, her di zî seba PKKyî heman vatişan vatî û her di zî vernîya kamerayan de ameyî kiştiş.
AMED