OZGUR PAKSOY/RIFAT ŞAHÎN / MA/AMED
Çend rojî verê Serekê Amerîka Donald Trumpî bajarê Kuddusî sey paytextê Israîlî şinasnabî û dima ra mabênê Tirkîya û Israîlî de munaqeşeyî dest pêkerdbî. Reyna sere de Filistîn û zaf cayanê dinya de pêrodayîşî dest pêkerdî.
Babete ser o Hemsereka Pêroyî ya HDPyî Serpîl Kemalbaye qisey kerde. Kemalbaye va ‘doza Riza Zerrabî û belgeyê Man Adasi yê ke Kemal Kiliçdarogluyî aşkere kerdî ver Erdogan kewto tengasî’ û wina dewam kerde: “Cok ra Erdogan demêko derg o ke hewl dano rojeve bibedilno. Badê ke babeta Kuddusî erzîyaye orte, Erdogan zî hewl dano nê babetanê bînan bido vîrîkerdiş.”
Kemalbaye dîyar kerde ke Trumpî pîmê bombeyêkî anto û wina domnaye: “Hukmatê AKPyî verê cû wextê hedîseyê Mavî Marmara de xora Kuddusî sey paytextê Israîlî dîbî. Nika zî seba ke tengasîya xo binimino, hetkaran kom keno. Çimkî Erdogan wexto ke şîbî Kuddus, bi vatişê ‘şima xêr ameyî paytextê Israilî Kuddus’ têrî mendbî. O wext yew îtîrazêk daxî nêkerdbî. Ewro werişto, vano ‘Israîl dewletêka terore ya’. Netanyahuyî zî Erdogan rê eynî çîyî vatî. Nê dewletî wexto ke babete bena menfîetê înan, sucanê yewbînan erzenî orte. Raştîya xo de Erdogan, Netanyahu û Trump zî eynî çîyan kenî. Derdê înan pratîzekerdişê polîtîkayê înan î.”
Nê çimanê ma ra ewnîyenî û zuran kenî
Kemalbaye peynîya qiseykerdişê xo de wina va: “Erdoganî tepişîyayîşê domanêkî nîşan dabî. Labelê Kemal Kurkut Newroza Amedî de ame qetilkerdiş, ti kes nêame cezakerdiş. Cenazeya Dayîka Taybete 7 rojî erd de mend, labelê ti kes vengê xo nêkerd. Dayîka Cemîle mecbûr mende ke cenazeya Cemîleye dolaba cemedî de bivindarno. Hende dejî ameyî antiş, labelê nê vejîyenî mîyanê çimanê ma ra ewnîyenî û zuran kenî.”