Hemserokê KCD Hatîp Dîcle da zanayîş ke seba ke qirkerdişê Cizîrî Sûr de zî dibare nêbo, wezîfeyê gird keweno ser milê şarê Amedî û waşt ke şarê kurd têkoşînê xo gird bikero.
Hemserokê Kongreya Komelê Demokratîk (KCD) Hatîp Dîcle ser rewşa qirkerdiş û xoverdayîşê Kurdistanî qisey kerd. Dîcle dîyar kerd ke Sûr demêko krîtîk de yo û vîr ard ke bodrimê banan de zaf sîvîlî hêsîr mendî. Dîcle da zanayîş ke seba wayirvejyayişê Sûrî rayvistişê komelî yê sivîl ê Amedî de mîyanê hewldayîşan de yî û wina vat: “Ma nêwazenî wehşeto ke Cizîr de ma ra ame kerdiş, rayêko bîn dibare bibo.”
Dîcle destnîşan kerd ke seba vergirewtişê wehşetêko bîn wezîfeyêko gird keweno ser milê şarê Amedî. Hatîp Dîcle veng da şarê Amedî ke bêyî erey bimano nêrazîbîyîşê xo nîşan bidî û wina domna: “Qedexeya vejyayîşê teberî ya Cizîr de nê tena dijî çend taxan bî, ser pêroyîya qeza bî. No ser zî, seba nîşandayîşê nêrazîbîyîşê demokratîke şarî nêeşkîyaynî bivejyo teber, merdiman nêeşkîyaynê xo nêzdî pacayan bikerî. Rewşa Amedî bi no rengî nîya. 6 taxê Sûrî yê qedexekerde yî bi tena 3 taxan de şer giran o. 3 taxê bînî bêveng î. No ser zî şarê kurdî eşkenî nêrazîbîyîşê xo yê demokratîke nîşan bidî. Ez bi taybetê şarê Amedî ra vana; bêyî erey bibo, wa seba qirkerdişê bi sereyê Cizîrî de ame bi sereyê Sûrî de nîro, nêrazîbîyîşê xo yê demokratîke nîşan bidê.”
Reçeteyê xelasnayişî destê ma de yo
Dîcle da zanayîş ke Sûr bi dîroka xo ya 5 hezar serran ra zerrîya dîroka Amedî yo û ard ziwan ke seba verê çinkerdişê na dîroke û qirkerdişê merdimanê bêguneh bêro girewtiş KCD do têkoşînê xo bidomno.Dîcle hayr ant ser bêvengîya rayapêroyî ya dinya û sazîyê mîyanêneteweyî verba binpêkerdişê heqê merdiman ê Sûrî de û destnîşan kerd ke wa şarê kurdî kesî ra hetkarîya omidî nêkero û qûweta xo ra bawer bikero. Dîcle wina dewam kerd: “Ma heta peynî zorî bidî mekanîzmayê demokratîkî, labelê ma xilaskerdişê xo înan ra omid nêkenî. Reçeteyê xelasnayişî, destê ma û şarê ma de yo. Bi têkoşîn û xoverdayîşê ma reyde beno.”
Dîcle hêriş û nêzdîbîyîşê AKP bi taybetî zî reîscûmhûrê Erdogan ke PYD bi israr hedef gênî ser aşkera kerd ke AKP û Qesr bîyîşê armancê xo, Hereketa Azadî ya Kurdistanî zey astengîyêko gird vînenî. Dîcle ciresna ke peynî ke TAK verpirsîyariya çalakîya Enqera girewt ser milê xo zî, AKP bi israr YPG hedef damusna û wina dewam kerd: “Seba YPG çalakîyeke bi na rengî virazê, sebebê xo çin o. YPG heta nika verba tîvariya Tirkîya ti çalakî nêviraşta, YPG bi aqilane têgêrîyena. Verba topvaranê Komara Tirkîya zî bi sebir nêzdî bena.”
Pêrokîn dîktatorî qediyenê
Dîcle faşîzm zey asta tewr berz ê dewlet-netewan bi name kerd û wina vat: “Bi faşîzmî zîhnîyetê neteweya dewlete zî qedya yo. Fina heme dîktatorîyê faşîst ê dinya, AKP zî qedîyeno. Senî emrê faşîzmê Franco heta bi heta dewam nêkerd, senî faşîzmê Hîtler, Salazar, Kenan Evrenî cayê ke beralî bîyî. Rojawan de bi saya têkoşînê hêzê kurdan DAIŞ ame zeyîfkerdiş. Aqûbeta zîhnîyetê AKP zî do bi no şiklî bo.”
Mekanîzmayê derbe dewre de yê
Hemserokê KCD Hatîp Dîcle hayr ant polîtîkayanê herb yê AKP ser û aşkere kerd ke, eke AKP herbî de israr bikero, wesar de herb do bi heremena Kurdistan ra bi sînor nêmano û vilayê her ca bibo. Dîcle hayr ant vatenanê Rayverê Şarê Kurd Abdullah Ocalan’î yê ‘eke maseyê diyalog wedarnê, do mekanîzmayê derbe bikewê dewre’ ser û aşkere kerd ke ewro Amed de, Cizîr de mekanîzmayê derbe dewre de yê. Dîcle peynî de aşkere kerd ke eke AKP nêageyro mase ser, Tirkiye do hetê kaosekê xorîn şiro û açarniyo zey Irak û Sûriye.
ANF/AMED