HDP no weçinayiş de serkewtişeke zehf xişn bi dest kerd. Tarixa komarî de heta nika kurdan kinarê xo temsîlkerdiş de no hewa yew firsend nêdiyo. Na semed ra zî îqtîdara AKPî, hemverê na serkewtişî de zehf hêrs bîy û bertekêy wişk nîşan day. Demo ke merdim ewnîyeno qewimyayişêy ke nê çend rojîy virazyenî zî no serkewtiş ra beste yo.
Nê herîşîy di eslê xo de vernîya weçînayîş de dest bi kerdîy. Mîtîngê ke HDPî verniya weçinayiş de kerdîy, hema hema vaci hemînan de hêrişî HDPijan ame kerdene. Mersinî ra bigî heta Edene, Erziromî ra bigî hetani Çewlîg û dima zî teqîyayiş ke Amedî de virazya finakê nê hêrişanîy. Hetanî weçinayîş bi hêrişey inasarenan AKP waşt ke HDP kaşbiko mîyanê provokasyonan û bi no hawa zî xo hezey ke “xelaskar ” nîşan bido. La şar nêdekewt dameya AKPî.
AKP derbê gird werd
Weçînayiş de AKP yew derbê zehf gird werd. Hîris serrî yo ke desthilatdar a, raya ewil a ke AKP enawa yew derb wena. Bi taybet zî Kurdistan de. Hema vaci AKP, Kurdistan de biya partiya tabelayî. Tena Kurdistan de ney heme şaristananê Tirkiye de AKP veng vînî kerd. Weçînayiş dima encama ke vecîya werte, semeda AKP xelasîyayîş dest bi kerdo. Coka AKP inasar har bîya. Bi na hêrsbîyayiş çimê AKP tarî kerda û çiyek nêveynena. Demo ke merdim na çerçewa de biewniyo, eşkeno mana bido nê hêrişanê AKPî.
AKP ewniya ke weçînayîş de bi rayîrê fermî encam negirewt, nara sere bi rayîranê leymin (kilêr) da. Coka provokasyonî ke verniya weçînayîş de nêtewiştbî, waşt na ray bi destê azayanê kontrayê dewletî rey de bikero. Semeda nê hêrişan zî vera weçinayiş ra hedreyeya xo kerdbîy. 9’ê hezîranî de AKP bi kiştişê azayê hîzbullahî Aytaç Baranî rey de waşt ke nakokiya desan serran ke beyntarê PKK-HÎZBULLAH tayna akero. Birîna ke qaşik tewişta, waşt rayna bikeno û gonî bikero. Armancê AKP î aye bike, bi no hawa têmîyankewtişeke Kurdistan de serwer bibo û aye zî no têmîyankewtişî de rayna xo hezey xelaskar nîşan bido. Yanê do bivaco: “Biewnê, şima min nê weçînay, her ca de serebut (hedîse) serwer o.” Bi enawa waşt ke serê şaranê Tirkiye de têmîyanekîye awan biko û no zî semeda berdewamîya desthilatîya xo bixebetno.
Gladîyoya Newe
Di eslê xo de tena na weçînayîş de ney, heta nika desthilatîya AKP zehf caran sere bi no hewa hêrişan kerdo. Bi taybetî kam wext ke AKP duştê Tevgera Azadî kewt tengîy û xetereya vinîkerdişê binçenga xo ciwîya, aye wext hîn zehfêr hêriş kerd. Heta demo ke nizd AKP nê galeyan (hêriş) bi Gladiyoya Kehan rey de viraştênê. Yanê ma eşkenîy vacî hetanî hêrişa hemverê hîrê cenî yê ke Parîs de amey qetilkerdiş (Sakîne, Fîdan, Leyla) zî AKP Gladiyoya verên xebetnay. La semeda ke zehf caran hemverê Tevgera Azadî û kurdan inasar hêriş ameybî viraştiş, şarê kurd ca de nê hedîsan deşîfre kerdîy û bi no hawa kayî desthilatdarî zehf caran veng vetîy.
Nê rojanê peynîyan de aseno ke AKP xo rê yew Gladîyoya Newe viraşto û bi no hawa hêrîşê kurdan keno. Yeno fehmkerdiş ke mîyanê nê Gladiyo ya newe de zehfêr kontrayê DAIŞ û organîzasyonê bi na hawa ca genîy. Operasyona bi provokasyonî ya ke Agirî de virazya, bombeyê ke Mersîn û Edene de teqay, Hamdullah Oge yê ke Çewlîg de hîris fîşek rey de bi şekileke wehş amey qetilkerdiş û teqiyayîşê ke Amedî de virazya, heme zî ma rê na organîzasyona newe nîşan danîy. Rayna herîşa tewr peynî ke Amedî de hemverê serekê ÎHYA-DER î qewimya û dima hîrê welatî ciwîyayişê xo vînî kerd zî eynî çî îfade kenîy. Miyanê nê organîzeya newe de, heme tîreyî (tîrkeman) şinê gruba Tevhîdî ser. Yeno zanayene Tevhîd, yew polê DAIŞî yo. AKP ke hemverê Şorişa Rojawanî her tim dijminatiya xo bi piştîdayîşê çeteyanê DAIŞî rey de nîşan kerdê, na ray bi destê heman çeteyan hemverê leteya Vakurî nawit.
AKP de kayî zehf î
Vatişê: “Dewleta Osmanî de kayî (oyn) zehf î”esil semeda AKP î viyarte yo. Raşta zî AKP no kinar de heme polîtîkayanê Osmanî xebetnena. Semeda binçenga desthilatî vînî nêkero eşkena heme raybazan bixebetna. Senî ke dewleta Osmanî de semeda domkerdişê îqtîdarî yew şewe de padîşahî heştês birayanê xo fetisnaynê, AKP zî na semed ra eşkena welat tedin biveşno. Na semed ra înan rê çiyo ke muhîm binçenga desthilatî yo, no rayîr de çi bedel yeno dayîş qet xemê înan de nîyo. Stîlê AKPî ya rayberdişî, her tim ardişê şaranê cîyayan ya hemverê yewbînan sero ameyo awan kerdene. Her tim bi no hawa nakokîyanê şaranê cîyayan sero îqtîdara xo domneno.
Serkewtişê HDP î heman awayî yeno maneya ke serkewtişê prosesa çarekerdişê. Şar no weçînayîş de vengê xo dayîy çarekerdişê mesela kurdan. Na raştî di eslê xo de AKP zî veynena. La semeda ke AKP nêwazena na mesele çare bikero, bêxeyra çarekerdiş heme rayîranê leyminan şuxulnena. Coka lazim o na raştî qet nêro vîrîkerdiş.