HUSEYÎN ELMALI / ANF / STRASBOURG
Hetkara Sereka Komîsyonê Yewîya Ewropa û Temsîlkara Berz a Têkilîyanê Teberî û Asayîşî ra Berpirsîyare Federîca Mogherînî Parlamentoyê Ewropa de derheqê hêrişê dagîrkerîye yê dewleta Tirkî de qisey kerde.
Mogherînî va ‘ma wazenê binê çimeyê Neteweyê Yewbîyayeyî de rewşêka demokratîke saz biba’ û wina dewam kerde: “Seba naye zî hem 28 endamê Yewîya Ewropa hem zî Konseyê Asayîşî yê Neteweyê Yewbîyayeyî seba ke fek rewşa newîye ra verade ê xîret kenê. Ê Tirkîya ra wazenê ke ca de çalakîya leşkerî ya yewhete vindarna û nê hêrişî seke tehdîtê serkewtişî yê vera DAÎŞî de yê. Hêriş eşkeno têkilîyê Koalîsyonê Mîyanneteweyî yê bi hêzanê herême bitaybetî Kurdan bixeripno. Hêrişî do tena DAÎŞî rê bidê karkerdene. DAÎŞ tena herême ney, Yewîya Ewropa û dinya tehdît keno. Hayîya ma esta ke Tirkîya wazena asta mîyanêne de se bikera.”
Mohgerînî vist vîrî ke Yewîya Ewropa seba multecîyanê Sûrîye yê Tirkîya de 3 mîlyar hetkarîye bi Tirkîya kerdî û wina va: “Binpaykerdişê heqanê komelî yê herêma Vakur û Rojhelatê Sûrîye nênê qebulkerdene.” Mogherînî bale ante ke seba qedînayîşê çalakîyanê leşkerî yê Vakur û Rojhelatê Sûrîye amancê înan ê destpêkî yo û ganî ê giranîye bidê serê peydakerdişê rayîrê çareserîye yê binê kontrolê Yewîya Ewropa de. Mogherînî da zanayene ke seba kombîyayîşê Wezîrê Karan ê Teberî yê Yewîya Ewropa ke dişeme do Luksembûrg de do bêro kerdene Temsîlkaro Taybet ê Neteweyê Yewbîyayeyî yê Sûrîye ame vengdayene. Mogherînî vist vîrî ke Yewîya Ewropa û Konseya Asayîşî ya Newteweyê Yewbîyayeyî kom bîyî û va ‘ê do vurnayîşê demografîyê herême qebul nêkerê’.