Sîyasetmedarê Kurdan Hatîp Dîcle derheqê hêrişê dagîrkerîye yê dewleta Tirkî de dîyar kerd ke 9ê Teşrîna verêne de destpêkerdişê hêrişan tesaduf nîyo û wina dewam kerd: “Hêrişî dewamê Komploya Mîyanneteweyî yî. Înan bi hêrişan hewl da şorişê Rojawanî ke bi stratejî, paradîgma û rayberîya Birêz Ocalanî de amebî awankerdene tasfîye bikerî.”
Artêşa Tirk û çeteyê ci 9ê Teşrîna verêne ra nata bi tanq, top û teyarayanê xo hêrişê Vakur û Rojhelatê Sûrîye kenî û heta nika bi seyan kesî ameyî qetilkerdene, hendêna zî bîyî birîndar. Seke yeno zanayene Rayberê Şarê Kurdî Abdullah Ocalan zî 9ê Teşrîna verêne de bi zextê dewletanê komplogêran Sûrîye ra amebî vetene û prosesê komplo kewtbî dewre.
Sîyasetmedarê Kurdan Hatîp Dîcle hêrişê dagîrkerîye yê dewleta Tirkî ser o qisey kerd û derheqê ‘Herêma Biewle’ de ajansê Mezopotamya ra Ferhat Çelîkî rê qisey kerd. Dîcleyî dîyar kerd ke komplo ra 21 serrî dima seba ke şorişê Rojawanî ke bi stratejîyê Birêz Ocalanî amebi awankerdene tasfîye bikerî, dest bi hêrişî kerdî.
Dîcleyî va ‘9ê Teşrîna verêne de destpêkerdişê hêrişan tesaduf nîyo’ û wina dewam kerd: “9ê Teşrîna verêne de Birêz Ocalan bi Komployêka Mîyanneteweyî reyde têrî mendbi. O wext Amerîka serkêşîya komplo kerdêne. Ewro zî 21 serrî ra dima bi serkêşîya Amerîka de hêrişêko winasî dîyayo destpêkerdene. No tesaduf nîyo. 9ê Teşrîna verêne de amanc tasfîyekerdişê Birêz Ocalanî bi la sernêkewtî. 21 serrî ra dima na reye seba şorişê Rojawanî ke bi fikir û stratejîyê Birêz Ocalanî ameyo averberdene tasfîye bikerî, hêriş kenî.”
Aye dame ewro zî dewam kena
Dîcleyî bale ante pêvînayîşanê Îmrali ser û dîyar kerd ke Birêz Ocalanî pêvînayîşan de heyetê dewlete ra vatbi “Rijîyayîşê Dewleta Osmanîyan ra dima wextê awanbîyayîşê Komara Tirkîya de îttîfaqêko gird yê Kurd û Tirkan estbi. Ganî ma zî nê îttîfaqî awan bikerî. Neke çîyo ke beno dame ya. No zî do zirar bido Tirkîya. Ma senî ke o wext îttîfaq kerdbî, ganî ma nika zî bikerî.” û seba ke projeyê Rojawanî Tirkîya de zî awan bibo pêşnîyazî kerdbî. Wina aseno ke dewlete naye qebul nêkerda. Aye dame ewro zî dewam kena.”
Seba yewîye wezîfe keweno milê herkesî ser
Dîcleyî qiseykerdişê xo de qala çalakîyanê Kurdan kerde û muhîmîya yewîya neteweyî ser o vindet. Dîcleyî wina dewam kerd: “Birêz Ocalanî wextê pêvînayîşanê Îmrali de Birêz Mesût Barzanîyî seba hemserekîya kongreya neteweyî pêşnîyaz kerdbi. Ewro no mîsyon reyna zî milê Barzanîyî de yo. Siloganê ‘Yew o yew o yew o Kurd yew o. Yew o yew o yew o Kurdîstan yew o’ Başûrê Kurdîstanî de zaf ameyêne eştene. No silogan vilayê heme Kurdîstanî bi. Nika çîyo ke keweno milê ma no yo, ganî ma konferansê yewîya neteweyî kom bikerî. Ez bawer kena ke eke Birêz Barzanî nê mîsyonî bigîro milê xo ser, ma eşkenî konferans kom bikerî. Seba naye wezîfe keweno milê herkesî ser. Wa hunermend û roşnvîrê ma şarê ma teşwîq bikerî.”
Eke ma nînan bikerî ma do serbikewî
Dicleyî peynîya qiseykerdişê xo de da zanayene ke ganî mehkemeyê mîyanneteweyî îqtîdarê Erdoganî ra hesab bipersî û wina dewam kerd: “Wijdanê merdimîye ancax wina rehet beno. Çimkî îqtîdar bi hawayo aşkere vano ke do heta 2023î bi îdeolojîyê Îttîhat û Terakkîyî dewam bikerî û heta Asyaya Mîyanêne xeyalanê Neo Osmanîyan pê bîyarî. Xora eke şima bala xo bidî Erdogan raşteyan de nîşanê verge keno û hewl dano xeyalanê Tirkîtîye pê bîyaro. Coka hetê Kurdan ra tehlukeyê qirbîyayîşî esto. Bi hawayo aşkere vanî. Bi hawayo hovane hêriş kenî. Nika ma Rojawan de vînenî. Ewja de sîlehanê kîmyewî bikar ardî. Ganî sey Mîlosevîçî bêrî mehkemekerdene. Wezîfeyê ke kewenî milê ma xoverdayîş, pawititşê yewîye û têkoşîn î. Eke ma nînan bikerî, ma do qezenç bikerî.”
STENBOL