TOPRAK EREN / ANF / BEHDÎNAN
Vera mezel û goristananê şehîdan ê PKKyî de hertim hêrişî benî û zirar dîyeno mezelanê şehîdan û erjanê merdimîye yê Kurdan. Tewr peynî Roşanê Qurbanan de hêrişê mezelanê Licêya Amedî amebi kerdene û mezelî amebî texrîbkerdene.
Endamê Komîteya Şehîdan ya PKKyî Orhan Lotûsî hêrişê ke vera mezel û goristananê şehîdan de yenî viraştene ser o qisey kerd. Lotûsî dîyar kerd ke bêxera DAÎŞ û dewleta Tirkî ti hêz hêrişê mezel û goristanan nêkeno û da zanayene ke ganî kurdîstanijî wayîrê mezelanê domananê xo bivejyî.
Lotûsî qiseykerdişê xo de qala muhîmîya şehîdan kerde û wina va: “Şehîdî çime û hêzê xoverdayîşî, manewîyat û ruhê Kurdan î. Ti îdeolojî, bawerî û dîn de nê hêrişî meşrû nînî dîyayene. Nimuneyê nêyî zî çin o û heme bawerîyan de ameyo qedexekerdene. Tewr peynî DAÎŞî hêrişê cayanê pîrozan kerd û hetê merdimîye ra ame mehkûmkerdene. Bêxera DAÎŞî dewleta Tirkî zî hêrişê mezelan kena. Xora no zî nîşan dano ke her di eynî zîhnîyetî ra yî.”
Ganî ma vera hêrişan de bivinderî
Lotûsî dewamê qiseykerdişê xo de wina va: “Ti şar nêşêno erjanê xo yê manewîyan ra qerfîyaye bicuyo. Cokra ganî kurdîstanijî wayîrê mezelanê domananê xo bivejyî. Ez veng dana şarê Amed, Serhed, Garzan, Dêrsim, Wan û Riha û heme Kurdan ke wa vera hêrişan de bêveng nêmanî. Ez bawer kena ke şarê ma do nê hêrişan qebul nêkero û cewabêko hewce keno, do bido dişmenê xo.”