MEHMET ŞAH ORUÇ / MA / AMED
Artêşa tirkî seba ke pêrodayîşan de derbanê girdan gerîlayan ra wena, heyfê xo cenazeyan ra gêna. Hewteyêk verê leşkeran Dêrsim de îşkenceyê cenazeyanê gerîlayan kerdbî û her ke şono vera nê îşkenceyî de reaksîyonî zêde benî.
No het de perso ke Parlamenterê HDPyî Alîcan Onluyî Wezîrê Pawitişîye rê kerdbî rê hîn zî ti cewab nêameyo dayene. Babete ser o Endamê Kongreya Îslamo Demokratîk (DÎK) Mele Abdullah Arkanî qisey kerd û da zanayene ke nê hêrişî polîtîkayê dewlete yî.
Arkanî dîyar kerd ke goreyê Qurenî merdim pîroz o û wina domna: “Keso ke merdimêk bikişo, seke heme dinya rijnayo, keso ke merdimêk bixelisno zî seke heme dinya xelisnaya, hesibîyeno. Bawerîya merdimî çi bena wa bibo, ganî cenaze rê rêz bêro girewtene. Hêrişê cenazeyan kerdene, nîjadperestîya tewr girde ya.”
Wa hetê mazlûman de ca bigîrî
Arkanî şerê Uhudî da vîr û wina va: “Şerê Uhudî de hêrişê cenazeyanê 72 sehabeyan amebî kerdene. Ewro mumînî ê kesê ke hêrişê cenazeyan kerdbî, lanet keno. Nê domanî seba ke heqê xo wazenî, kişîyayî. Îşkenceyê cenazeyan kerdene, polîtîkaya dewlete ya. Yê ke nasname, kultur û nîjadan înkar kenî, raştîya xo de vera Homayî de vejîyenî. Ez veng dana heme şarê xo, ke hişyar bibê. Gerek ma dînê xo Fîrawunan rê qurban mekerî. Wa herkes hetê mazlûman de ca bigîrî û vera zalimîye de têkoşîn bidî.”