Herzewbîn projeyê Sansa HES ke mavêna Pîlemûrîye û sînoranê Erzîngan de ser Çemê Karasû de viraştişê ci ame plankerden, netîceyê têkoşînê hiqûqî yê dewijan de şîrket herem ra peyser ancîya. Dawaya ke hetê pawitox Bariş Yildirim, Sezahi Demîrbîlek û Umît Altaş amê akerden, hetê Mahkemeyê Îdarî yê Sêwas qerarê betalkerden ame dayen û Daîreyê 14. yê Şûraya Dewletê kî no qerarî qebûl kerd.
Aktivîstê çorme pawitox Bariş Yildirimî da zonayen ke sînoranê Erzîngan û Dersim de ser Çemê Karasû de tayî planê HESî estê. Yildirimî da zonayen ke Regulatorê Sansa û projeyê HES, Regulatorê Armagan û projeyê HES û Koyanê Mûnzûrî de kişta Erzîngan de 4 projeyê bendawî estê û aşkere kerd ke nê projeyan ra tenya derheqê Bendawê Kemah û HES I-II de qerar ameyo dayen.
Peyser ancîyay
Pawitox Bariş Yildirimî da zonayen ke verîya coy rapora Şîrketê Ceyran yê AK-EL Kemah ke ÇED ra girotibî hetê Mahkemeya Îdarî yê Sêwas ra amê îptal kerden. Peycoy rapora newî ke hetê ÇED amê giroten de dawaya betalî abîya û dawa qezenc kerdî. Yildirimî vist vîrî ke rîwalê projeyê ke ser Çemê Karasû ameyê înşakerden û tayî hona yenê înşakerden çimeyê Deştê Firatî ekosîstemê Karasû qedîyayo û nê zonayişan bare kerd: “Ma dûştê Regulator û projeyanê HES yê Sansa ke sînoranê mulkî yê Dersim de yê de kî dawa akerd. Dûştê nayî de ma sazgehanê eleqedar de serpirodayiş kerd û waştena betalkerdişê projeyan kerd. Ma dûştê qerarê erêyî yê ÇED dawa akerd. Ma bi şarê herem ra pîya xêlê aktivîte û nûmayişê cîya viraştî. Netîceyê serpirodayiş û nêrazîbîyenanê demokratîk yê ma de şîrket peyser ancîya û herem ra agêra û beyan kerd ke proje ra fek verada.” Yildirimî da zonayen ke dûştê Regulatorê Armagan û Projeyê HES de kî înan dawa kerdo a û pêvacoyê hiqûqî rameno.
Ganî dûştê HES û bendawan têkoşînê demokratîk berz bo’
Pawitox û aktivîtê çorme Bariş Yildirimî da zonayen ke wexto ke sînorê mulkî yê Dersim yenê nîrxnayen heta Erzîngan, Çewlig, Xarpêt û Meletî ser çeman de projeyê bendawî yenê înşakerden û hayr ant qirkerdenê ekolojîkî ser. Dûştê bendaw û projeyanê HESî Yildirimî hayr ant têkoşîn û nêrazîbîyenê demokratîk ser. Yildirimî îqazê ‘eke nê bendaw û projeyê HESî temam bibê mîrasê kulturî û natûrî yê bi hezaran seran yê Dersim dê bin awe de bimane’ kerd û va, no çî do hetê îtiqat, zon û kulturê Dersim sebebîyetê rewşekê bêtelafî bido.
DÎHA/ERZÎNGAN