Qûwetanê Pawitenê Rojawa 6’ê Gulan ra tepya Kantonê Kobanê û Cezîrê ra hetê Girê Sipî operasyon destpa kerdî û 15’ê Hezîran’î de na herem çeteyan ra xelesnay. Na sûk didi seriyo bin qontrolê çeteyan de bî. Rejîma faşîst yê Baas 1968’î ra tepya Kurdan Girê Sipî ra kerd sirgun, hurendiya Kurdan eşîretanê Ereb bi ca kerd. Rejîmî nameyê Girê Sipî zî zey Tel Ebyad vurna. La Girê Sipî sûka Kurdan a.
Girê Sipî serva çeteyanê DAİŞ çima mihîm bî?
Na sûk mavêna Kobanê û Cizîrê de ya. Kêberê sînor yê Akçakale ya. DAİŞ heta nika tifing, top, gule, destegê eskerî no kêber ra vêrna ra. Herzewbîn çeteyê newî yê ke waştî şirê herb bikerê tiya ra şî. Nika demara DAİŞ ya gird birniya û korîdorê ci yê ganî girotiya. Çeteyê ke binkewtî xeylê ci ravêrdî hetê Tirkiye û xeylê ci zî şî hetê Raqa. DAİŞ Raqa xo rê zey paytext îlan kerda. Neyra tepya zî îyê de zerreyê hewldayinanê hêrişkerdin de bê.
Xelesnayişê Girê Sipî xo ra piya kancî netîceyî ardî?
‘Kemerê Ereb’ yê rejîma faşîst hewadiya. Til Ebyad bi Girê Sipî. Kantonê Cezîrê û Kobanê resyay pê. Xelesnayişê Girê Sipî mijdaniya Suriye ya demokratîk da şaran. Bi xelesnayişê Girê Sipî omidê serbestî zî bi gird. Şarê ke Rojawa de ciwyenê nika zanê ke gam bi gam nezdiyê serbestî û serkewtişê gird benê.
Serkewtişê Girê Sipî pêrokîn dinya de veng da. Rojname, ajans û televizyonanê namedar behsa serkewtişê rewa yê qûwetanê Kurd kerdî û kêfweşiya xo damisnay.
Bê hikûmeta AKP xeylê çormeyan kêfweşiya xo aşkere kerdî. La sermiyanê hikûmeta AKP verra xelesnayişê Girê Sipî zaf hêrs bî. Erdoğan’o dişmenê Kurdan bi vengê berz hewara çeteyan kerd. Qûwetanê koalîsyonî yê ke çeteyan bombevaran kerdî rê nêrazîbiyen damisna, DAİŞ nê, la qûwetê pawitenê Rojawa zey ‘terorîst’ biname kerd. Erdoğan nika zî hewl dano ke şarê Kurd û Ereban biyaro pêver.
Sermiyanê dewleta Tirk çima hendayî bi hêrs biyê?
Çi ke stratejî û hemleyê Tirkiye yê rojhelatê miyanî binkewnê. Polîtîkayê qilerîn yê destekdayinê çeteyan veng-tol vejenê. Heta bîn ra xeyalê ci yê herema tampon binaw bî. Rixmê hewldayinê verîgirotiş yê dewleta Tirk, Rojawa de şarî sîstema xo ya demokratîk înşa kenê. Hemleyê verra çeteyan ra piya riyê raşt yê Tirkiye zî hewna rind zelal vejyeno teber. Belgeyê ke ser çeteyan ra vejyenê zî hemkariya Tirkiye û DAİŞ rafînenê ver çiman. Polîtîkayê Tirkiye yê verra Rojawayê Kurdistan Bakûr, Başûr, rojhelatê Kurdistan zî eleqedar keno. Cok ra babeda Girê Sipî de zî maskeyê AKP fina kewt û riyê ci yê sextekar vejya werte. Bado kewtişê Til-Ebyad ra piya çeteyanê minafiq verrê xo day hetê Tirkiye. Dimenan de eskerê Tirkiye û çeteyê DAİŞ piya vejyay. Tirkiye çeteyan girot bin qontrolê xo û nika onca-fina planê qilerîn virazenê.
La çi qe planî kenê wa bikerê, planê qilerîn îyê dê her tim veng-tol bivejyê. Senî ke hesabê şaş Girê Sipî ra ageyrar, neyra tepya zî hesabê şaş û qilerîn dê Kurdistan ra ageyrê. Wa rihê şehîdê ke goniya xo serva serbestiya welatî rijnay şad bo.