Tertelê qilebnizan ser ra 2 asmî vêrdî ra.
Raştiye de her çî verê çiman dero. Seweta homete tewa tolde de ya zî nimite niyo.
Teyna qerardayoxê na tertelî her çî tarî vînenê.
Gorê nînan ‘xeletiye’ biya, hama hetê kamî ra, naye nêwazenê eskera kerê.
Anqara de 50 serokfermandarî çînê, 50 serokwezîrî çînê.
Onca zî 2 asmî yo sermiyanê tertelî eskera nêbene.
Eke 50 serokfermandarî bibiyenê, 5o serokwezîrî bibîyenê, mordemî na ‘’hereykewtene’’ famkerdenê.
Anqara de jû serokfermandar, jû serokwezîr esto.
Kamî fermanê tertelê qilebanizan do, hona zelal nêbiyo.
Nî hurdemîne ra jûyî qerar do. Serokfermandar ya zî serokwezîr.
Herhalde çawisê qereqolî nêşîkîno qerarê na tertelî bido.
Pîlotî xo bi xo balafirge ra ranêwirzenê û qilebanizan tertele nêkenê.
Halo niyanende anqarayizî jû komîsyon nanê ro.
Nêwazenê mesela halbikerê, ya!
Coka fînê herey ke mesela bêro vîra kerdene û rojdem ra waro gino.
Gorê xêlê azayanê komîsyonî, her çî araze wo. Gorê tayîne zî hona her çî zelal nêbiyo.
Tabî azayê komîsyonê ke niya fikrînê leto jede mebusê AKaPe yê.
Vatîsê qomê Qilebanî bîrûbazarê nînan de niyê.
Kamî teretelê qilebanizan rê ferman da?
Serokfermandar? Serokwezîr?
Pekî kamî zonayîs da anqarayizan?
MÎT? Îsraîl? Amerîka?
Na mijare zî zerrê 2 asmî de zelal nêbiye.
Bêvengiye, bêvengiye, bêvengiye.....
Nika vanê: Komîsyon gureyeno. Ebi naye tene waxt qezenc kenê.
Niya rê anqarayizî!
Heştîrê qomê Qilebanî bê mane yê seweta anqarayizan.
Zulmkarî heştîrê çiman de niyanêdanê, cira keyf cenê.
Tertele kenê, vanê: Vengê xo meveze doskariye bena!
Bi neqiye miletî cenê erzenê hepis, bi serran bê îfada zerre de cenê, vanê: Vengê xo mevezê dawa biya ra, mahkeme rê mudaxala mekerê!
2 asmî yo anqarayizê zalimî na tertele dibare kenê.
Hassa herî ra ma de qese esto vanê: 2 mirçikî çor çimî, binê vorê de herdo şa, o yo ke nêzoneno hero şa!