SELMAN GUZELYUZ/ MA / ANQARA
Dezgeyê Îstatîstîkî yê Tirkîya (TUÎK) derheqê çarigê serra 2018î de melumatî aşkere kerdî. Goreyê TUÎKî ekonomîya Tirkîya 5.2 gird bîya. 2 rojî yo ke çapemenîya hetgire naye ser o vindena.
Babete ser o Prof. Dr. Mustafa Altintaşî qisey kerd. Altintaşî va ‘seba ke TL erjê xo vînî kerd, mal zî erjan bi’ û wina domna: “Wexto ke mal erjan beno, xerîbî yenî tîya ra gênî. Çîyê ke Tirkîya de vay benî, seba xerîban benî erjan. Cok ra no girdbîyayîş tesîrê xo ziqaqan de nîşan nêdano.”
Altintaşî dewamê qiseykerdişê xo de qala polîtîkaya hukmatî kerd û wina va: “Eke ma dîqet bikerî, hukmatî seba tasarufî veng da. Hetta tayê çîyî kêmî kerdî. Labelê heto bîn de çîyê ke benî sebebê xerckerdişî zî zêde kerdî. Mesela ganî hukmat fek projeyê qenalî ra verabido, labelê no proje domîyeno. Reyna qala Ehlat de viraştişê qesrêkî yena kerdene. Yanî hukmat nêzano se keno. Ekonomîya hukmatî manena keştîya bêkaptane. Dîyar nîyo ke na keştîye ver bi kamcîn hetî şona. Çimkî çîyê ke lazim o hukmat bikero, ti ewnîyenî tam eksê ci yeno kerdene. Tirkîya heta ke aştîya zere û teberî pê nîyara, nêşêna krîzê ekonomîke ra bixelisîya. Xora zafaneyê xerckerdişan seba nê polîtîkayan şonî.”