YEKO ARDIL / STRASBOURG
Bitaybetî no 3 hewte yo ke kurdî û dostê înan payan ser de yî û wazenî Rayberê Şarê Kurd Abdullah Ocalanî ra xeberêk bigîrî. Bitaybetî bajarê Strasbourgî yê Fransa de vernîya dezgehê CPTyî de çalakîyêk dîyaybî destpêkerdiş û na çalakîye roja 13. de dewam kena.
Babete ser o Endama Komîteya Amadekare Medya Botane qisey kerde û vînayîşê xo arde ziwan. Botane dîyar kerde ke 23ê teşrîna verêne ra nata çalakîye dewam kena û wina va: “O wext ra nata 2 reyan CPT reyde pêvînayîşî ameyî kerdiş. Reyna sernameyê Heyetê Îmrali yê Mîyanneteweyî zî reyêk pêvînayîş ame viraştiş.”
Botane dewamê qiseykerdişê xo de wina va: “Wexto ke çalakîye dewam kerdêne, nizdîyê 4 rojan seba ke Parlamentoya Ewropa de kombîyayîşo ke temsîlkarê xeylê dewletan beşdar bîyî virazîya, cok ra ma zî vernîya Parlamentoya Ewropa de çalakîya xo domna. Heta nika ma bi çalakîyan xo vengê xo da eşnawitiş. Nika ra pey zî amancê ma o yo ke ma netîceyêk bigîrî. Eke CPT Rayberîya ma reyde pêvînayîşêk nêkero û nê pêvînayîşî bi hawayo nîzamin dewam nêkerî, ma zî do çalakîyanê xo bidomnî.”
Muxatabê ma tîya de yî
Botane peynîya qiseykerdişê xo de veng daye herkesî û wina qedênaye: “Çalakîya ma seke ma plan kerda, dewam kena. Nika ma rewşêka fîîlî daya destpêkerdiş. Heta nika beşdarbîyayîşêko muhîm virazîyayo û ganî ma nêyî hîna bihêz bikerî. Ez veng dana heme kurdistanîyan, cinî û ciwanan û heme welatperweran, çalakîya ma do heta ke ma netîce bigîrî, dewam bikero. Wa no bêro zanayîş ke hedefê ma yo esasî o yo ke Rayberê Şarê Kurdî Abdullah Ocalanî reyde pêvînayîş bibo û muxatabê ma zî tîya de yî. Yê ke wijdanê înan esto, ganî no proses de berpirsîyarîye bigîro xo ser.”