Hemseroka Tevgera Civaka Demokratîk ê Rojawa (TEV-DEM) ê Kantona Kobanê Eyşe Efendî ser tehdîdanê dewleta Tirk ê vera Efrîn û herêma Şehba de qisey kerd û da zanayîş, ke heta hêrîşê vera Rojawa dewam bikerê, 7 ra heta 70 serrî her yewêr ê înan leşker ê.
Efendî hayr ant hêrîşanê vera Efrînî ser û vist vîrî ke zey Kobanê do hewesê înan qirika înan de bimanê.
‘Heta ke hêrişî dewam bikerê…’
Eyşe Efendî aşkere kerd ke şarê kurd serkewtiş û serbestî de qerarê xo dayo û no qerarî ra peyser ageyrayîş nêbeno. Efendî waşt ke paştîdayîşo ke çormeyê Kobanê de ame viraştiş, çormeyê Efrîn de zî bîro viraştiş. Efendî da zanayîş ke ê îdare yan zî partîyêk ra nêtersenê, şarî ra tersenê û va, şarê Efrîn cewabê xo meydanan de da.
Eyşe Efendî ard ziwan ke hona xeylê quwet û çormeyî planê ser Rojawa kenê û va, heta ke vera Rojawa hêrişî biramê, her ferdekê Rojawayî do 7 ra heta 70 serrî zey leşkerêkî hereket bikero. Efendî ard ziwan ke ganî kurdî vera plananê herêmî û mîyanneteweyî de bibê yew
Efrîn û Kobanê yew o
Efendî vist vîrî ke Efrîn û Kobanê pêra xerîb nîyê û va, “Ma Kurd ê. Efrîn, Kobanê û Bakurê Kurdistan yew ê.”
Hemseroka TEV-DEM Eyşe Efendî vengê yewîya neteweyî da Kurdan û wina va: “Senî ke dişmenê ma ser babeda Kurdan de benê yewe, çima ma nêbê yewe? La çi heyf ke hona zî babeda yewîye de hona zî problemê ma estê. Kişta şehîdan de, malbatê şehîdan de, gonî de ma çar parçeyê Kurdistan kerdo yewe, la kişta sîyasî de ma na yewî hona nêviraşta.Nayî ra ewro firsendêko gird vernîya ma de yo. Eke tayî tewrê nayî nêbê, na mesele û tercîxa înan a.
ANF/SILÊMANÎ