BERHEM LETÎF / ROJNEWS / SILÊMANÎ
Çend rojî verê heyetêkê HDPyî şibi Başûrê Kurdîstanî û ewja de sere de Mesûd Barzanî reyde û çend pêvînayîşê bînî kerdbî. Endamê Heyetê Îdareyî yê YNKyî Rehber Seyîd Îbrahîmî derheqê pêvînayîşan de qisey kerd û melumatî dayî. Îbrahîmî da zanayene ke ê sey YNKyî destek danî xebatê ke hetê heyetî ra ameyî destpêkerdene.
Îbrahîmî va ‘ma amade yî ke sey YNKyî her tewir destek bidî xebatanê heyetî’ û wina dewam kerd: “Birêz Mam Celalî seba ke aştîye bêro, rolêko muhîm kay kerdbi û seba yewîya neteweyî xebate kerdbî. Ewro YNK rayîr û metodanê Mam Celalî domneno. Ma rayîrê Mam Celalî de şonî.”
Îbrahîmî bale ante zextanê dewleta Tirkî yê Vakurê Kurdîstanî de ser û wina va: “Kesê ke zîndananê Tirkîya de tepişte yî, înan seba ke têkoşînê aştîye da, ameyî tepiştene. Ma hetê aştî, dîyalog û peymane de yî. Birêz Ocalan rayberanê Kurdan ra yew o. Heta ke Ocalan nêbo, aştîye nîna. Cok ra ganî Ocalan azad bibo.”