OZGUR PAKSOY / MA / AMED
Aktîvîsta Tevgerê Cinîyanê Azadan (TJA) û parlamentera HDPyî ya Êlihî ya kehene Ayla Akat Ataya ke 30ê Gulane de tehlîye bîye, derheqê tecrîd û weçînayîşê 24ê Hezîrane ser o qisey kerde û melumatê muhîmî dayî.
Ataye dîyar kerde kesê ke şonî sindoqan ser, ganî nêvajî ‘ma raya danî AKP’ û wina domnaye: “MHPyî AKP reyde îttîfaq nêronayo. AKP bîyo MHP. Yê ke ray bidî AKP, raya înan şona MHP rê. Raştîya xo de MHP binê weçînayîşî de mendo. MHPyo ke nêşêno bendê weçînayîşî derbaz bikero, projeyanê Birêz Ocalanî reyde hewl dano bendî derbaz bikero. No hetê Îttîfaqê Milletî ra zî yeno kerdiş.”
Ataye qiseykerdişê xo de bale ante tecrîdî ser û wina va: “Sibata 1999î ra nata Birêz Ocalan binê tecrîdî de yo. Tecrîd ge-ge yeno girankerdiş, labelê heta nika qet nêameyo wedarnayîş. Tirkîya de demokrasî binê tecrîdî de ya. Şarê Tirkîya seba ke nêzanî, vera ci de reaksîyon zî nîşan nêdanî. Seba çareserîye projeyêkê yê Rayberê Şarê Kurdî Birêz Abdullah Ocalanî esto. Heta ke no proje nêerzîyo dewre, aştîye nêbena. Kilîtê çareserîye Îmrali de yo û heta ke Ocalan azade nêbo, çareserîyêk mumkin nîyo. Ganî şarê ma seba çareserîye şêro raya xo bixebetno. Ez bawer kena ke ma do serbikewî. Şarê ma xeylê zehmetîyan ra derbaz bi. Nika 2 îttîfaqî estî û her diz î bawer kenî ke bendê weçînayîşî derbaz bikerî. Eke merdim goreyê Kurdistanî biewnîyo, vîneno ke na rewşe lehê şaran de ya. Komelê Tirkîya bi hawayo tam nêzano welat de çi yeno cuyayîş. Wezîfeyê muxalefetî o yo ke şarî ra vajo.”