HAYRÎ DEMÎR / MA/ANQARA
Parlementerê CHPyî yê Stenbolî Sezgîn Tanrikulu bi nameyê MST TV (Televîzyonê Vengê Mezluman) de patentêko tescîlkerde girewt û hewte de rojêk medyaya komelkî ser ro weşan keno. Tanrikulu her roja dişeme saet 21.00î de MST TV de program virazeno û xo resneno bi hezaran merdiman.
Tanrikuluyî MST TV de qisey kerd û qiseykerdişê xo yê televîzyone de bale ant prosesê OHAL û îxlalkerdişê heqê merdiman ser o.
Tanrıkulu qiseykerdişê xo de wina va: “Îlankerdişê OHALî ra dima xeylê televîzyon û ajansî ameyî padayîş û êdî vengê medya bîyo tek tîp. Ma medyaya komelkî ser ro wazenê ke na rewşa yew vengî bişiknî. AKP di serrî yo ke nêverdeno medyaya hetgire, ma beşdarê programanê xo bikero û bikero meyman. AKP lîsteyê nameyan dayo televîzyonan û nêverdeno kesêk muxalîf beşdar bibo. Resnayîşê raştîyan zay muhîm o. Ma hîrê partîyê muxalîfî waşt ke pêvînayîşê komîsyonê derbe Meclîs TV ser ro bêro weşênayîş. Labelê no waştişê ma ame redkerdiş. Na rewşe ra dima mi qerar da ke medyaya komelkî ser ro pêvînayîşê komîsyonî biweşêna.”
Ê sermayegozaran rê xizmet kenî
Tanrikulu tewr pêynî wina va: “Heme heqî ma dest ra ameyî girewtiş. Tarîx ra nata xeylê çîyî bîyî, labelê heta nika Tirkîya de rewşêka wina lêmin nêameya dîyayîş. Kesê ke vengê xo kenê sey terorîstî yenê dîyayîş. AKP mîyan de ekîbêko bêhurmet esto. Xeylê kesî hetê hakimê FETOyî ra ameyî mehkemekerdiş. Ganî prosesêko newe yê mehkemekerdişî bêro destpêkerdiş. Ganî ma pîya hereket bikerî. Ez hewl dana ke hewte de reyêk bibî vengê îxlalê heqan. Wa hemwelatîyê ma CNN Turk, NTV û Haber Turkî padî, çimkî ey sermayegozan rê xizmet kenê.”