Hukumato tirk hetede seweta tertelê Dersîmî leborîna xo wazeno, hetede tertelê kurdan devam keno.
Seweta tertelê Dersîmî lebborîne wastene tabî çîyode rind o. Naye rê ma beme sa. Yê kam ke vijdanê xo esto, o gune sa bo. Leborîne çitur ama wastene, ebi sene hal no çîyode bîno.
Hal û hekatê leborîne wastene mirê tenê xerîb ame. Çike jê derwlete leborîne wastene hebe fermî bena û ebi jû merasîme bena.
Dersîm de nika peykerê Seyîd Rizayî esto. Aceba Erdoğan na vatena xora dime rozê sono Dersîm û verê peykerê Seyîd de çoku nano ro, naye ma demê verva ma de vîneme. Çike teyna Anqara de leborîne wastene mesela halnêkena. Gama virene rind a. Na game ra dime çi yeno, o muhîm o.
Hetê huquq ra heqê mexduran se benê, na dirvetya xorîye naye ra tepîya se melem bena, zaf zaf muhîm a. Mi vat mirê hebê xerîb ame, çike Erdoğanî hem waxtê referandum de hem kî waxtê weçînîtîs de zaf heştîrî verdayî de, hama dima tewa nêkerd.
Omid ken ke seweta Derrsîm nîya nêbeno. Dewleta tirkî gune pêro rayan rakero seweta melem kerdena kergana 38î.
Hama sikê mi esto. Çike hukumatê AKaPe hata nika xêlê çîyî ardî ra zon, çîyê ke hata nika nêamenê vatene, î vatî, lebelê pratîk de tewa nêvurna û statuko kan sevekna.
Demê referandumî de Erdoğan bervenê, wastenê Kenan Evrenî ra hêfê Erdal Erenî û domonanê bînan bijero. Hata ewro na derheq de tewa nêkerd. Kenan Evren jê her timî xorê bi wastena xo weşîya xo rameno. Verva Kenan Evrenî pers kerdene dest kerdo ci, hama ha wo çond serrî yo verva ci dewa ranêbîya. Namê Evrenî hona qislu, wendexanu û cadu ra vineto.
Mesela Dersîmî teyna ebi leborîne wastene halnêbena. Raştîya na leborîne mesela kurdan ra gireda wa. Ma vîneme ke hukumatê AKaPe qerar gureto û wazeno devam ra kurdan qirkero. Teyna nî 30 serranê peyenan de dewleta tirkî 40hezar ra jede kurdî qirkerdî, dewê kurdan vêsnayî.
Eke rast Dersîm ra leborîna xo wazeno, gune naye ra dima pêro kurdan ra, ermenîyan ra û asurîyan ra kî leborîne biwazo. Nî qomî hetê dewleta tirkî ra ame qirkerdene. Hata ewro kî hona kulrturê nî qoman bine zordarîya dewleta tirkî dero.
Heto bîn ra hen oseno ke AKaPe wazena ebi na game tarve CHP û Kemal Kiliçdaroğlu ro do. Na kî sik û gumanê mi kena jede ke, leborîne wastene ra dime gamê bînî nîne. Na gama Erdoğanî Kemal Kiliçdaroğlu tam kerd gosdarme. Se ke nêvat, na game çiqas cîddî ya aye rozanê verva ma de vîneme.
Çi beno bıbo AKaPe ebi na game hem Misto Kor hem kî Kamo Gosdarme kist.
Kamo Gosdarme hona kî vano ‘pêro arşîvu eskera kerê, ma kî ebi tarîxê bême têrî.’
Kamo Gosdarme hona vano ‘şoreş de çîyo nîyanen beno, dersîmizan dezê xo kerdê hemgen’
Erdoğan kî ebi herbê verva kurdan jû tertelo newe xane tirkan ra nusneno. Na semed ra xanê ma de o kî qetilkar o.
Heto bîn ra nîyadê peynîya ‘Kürt açılımı’ yê Erdoğanî kata şîye. Zerya ma vêsa, jede îman nêkerîme!