Verfekê Kongreya Azadîya Kedkaranê Kurdan Mahmut Alinakî va ‘çi heyf ke Kurdîstan û Tirkîya de înîsîyatîfêkê roşnvîran çin o’ û wina domna: “Eke bibîyêne û vera tecrîdî de bivindetêne, o wext baş bîyêne. Labelê sîyasetî vernîya çîyanê winasîyan girewto.”
Rayberê Şarê Kurdî Abdullah Ocalan 27ê temmuza 2011î ra nata nêşêno avûkatanê xo reyde pêvînayîşan bikero. Reyna 5ê nîsana 2015î ra nata yo ke destûr nêdîyeno endamê Heyetê Îmrali şêrî hetê Ocalanî û pêvînayîşan bikerî. Sey Ocalanî destûr nêdîyeno hepsîyanê bînan ke wa keyeyê xo reyde pêvînayîş bikerî û 2 serrî ra zêde yo ke ti xebere Îmrali ra nîna girewtene.
Verfekê Kongreya Azadîya Kedkaranê Kurdan û parlamentero kehen Mahmut Alinakî qisey kerd. Alinakî va ‘seke yeno zanayene verê cû ma seba ke Ocalanî reyde pêvînayîşan bikerî, muracatê Serekkomarîye kerdbi’ û wina domna: “Eke destûr biameyêne dayene, ma do dima ra bişîyêne Qendîl û ewja de pêvînayîşan bikerdênê. Labelê heta nika qet çîyêk nêame vatene. Ma seba ke nîşan bidî ke berpirsîyarê nê şerî AKP û Erdogan bi xo yî, muracat kerd. Ma eşkenî bi proje û hamleyanê neweyan AKP û Erdogan rê gaman tepîya bidî eştene.”
Alinakî dewamê qiseykerdişê xo de va ‘tecrîdo ke Îmrali de esto, teberê qanûnanê Komara Tirkîya de yo zî’ û wina dewam kerd: “Goreyê qanûnan ganî Ocalan hewte de reyêk merdimanê xo reyde bi telefonî qisey bikero. Reyna ganî 2 hewteyan de reyêk ganî pêvînayîşo padaye û aşme de reyêk zî pêvînayîşo akerde bikero. Goreyê mi no het de eşkîyayêne projeyî bêrî xelq kerdene. Seba wayîrvejîyayîşê Ocalanî, lazimîye bi kurd bîyayene, PKKyî bîyayene û HDPyî bîyayene çin a. Tena merdim bîyayene bes o. Çi heyf ke Kurdîstan û Tirkîya de Înîsîyatîfê Roşnvîran çin o. Eke înîsîyatîfêko winasî bibo û vera tecrîdî de bivejîyo, baş beno. Labelê sîyasetî vernîya çîyanê winasîyan girewto. Ancax bi no qeyde tecrîd yeno wedarnayene.”
Ocalan temînatê îstîkrarî yo
Parlamentera HDPyî ya Şirnexî Nuran Îmîre zî dîyar kerde ke kurdî û hêzê îttîfaqî vera înkar û îmha de têkoşînê pawitişê nasname û statuyê xo kenî û wina domnaye: “Ewro şexsê Birêz Ocalanî de şaranê Kurdîstan, Tirkîya û Rojhelatê Mîyanênî ser o tecrîd yeno domnayene. Ma vînenî ke hêzê emperyalîstî seba ke kaos û şer newe ra bidî dest pêkerdene, tecrîd de israr kenî. Herçiqas ke tecrîd hende giran o zî, birêz Ocalan bi hawayo zanaye û westayêk, seba ke Tirkîya û Rojhelato Mîyanên de çareserîye bivirazîyo, rol û mîsyon gêno milê xo.”
Azadî û ameyoxa ma girêdayeyê azadîya Ocalanî yî
Îmîre dewamê qiseykerdişê xo de wina va: “Birêz Ocalan sere de seba Tirkîya sîgortaya îstîkrarî yo û şexsê Tirkîya de seba aştîya Rojhelatê Mîyanênî wayîrê mîsyonêkê muhîmî yo. Cok ra Birêz Ocalan seba bindestan, cinîyan û kêmhûmaran hêvî yo. Raştîya xo de aye hêvî yena tecrîdkerdene. Sere de ma cinîyî û herkes ganî wayîrê Birêz Ocalanî bivejîyo. Ganî ma bizanî ke azadî û ameyoxa ma girêdayeyê azadîya Birêz Ocalanî yî. Heta ke Birêz Ocalan azade nêbo, komel tesilî azade nêbeno.”
AMED