No qîrayîs yê zonê ma wo. O, berveno, naleno xorî xorî. Çike bêwayîriya xo sêzut keno.
Ma dame zoniyanê xoro, vame zonê ma sono, zonê ma dano zoniyanê xoro vano “ez miren, simayê mi kisenê.”
Ça niya ro? Ala reye niyadê!
Bakurê Kurdistan de 3 unîversîteyî hayê endî maliman perverde kenê. Se beno bibo, no seweta ma jû firsedode girs o. Ala bêrê ke, hona jû elîfba ma caye nêosena. Ma “haskerdoxê” na zonî jû elîfba sero hurenîme.
Pekî bi na tore no zon merdene ra xeleşîno. Tabî nêxeleşîno.
Nika endî tam waxt amo, gune ma jû elîfba pêdakerîme, herkes gorê xo nênusno, herkes gorê xo kaynêkero.
Ez nêwazen jede halê zonê ma sero vinderîne. Çike na hal en rindek helbesto ceren yê Bedrîye Topaç ano ra zon:

SE BENO
Hetê mino çep bêkes
Hetê mino çep viran
Sêneyê mi de yew gelîyo xorin
Û qirîya mi ginena payîzî ro
Se beno emşo mi fehm bike

Vengê mi nêmcet
Vengê mi xo rê kor
Destanê mi de çekuyê dirbetinî
Û kuçanê mi de goristanê bêwayîrî zedînê
Se beno emşo mi bihesne

Bi asterîyan
Bi vengê lulikanê adirî
Mi biance zereyê xo
Mi biance ruhê xo
Se beno emşo mi tarîya şewa xo de vindî bike
****
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.