Hemsereka KCD û Parlamentera HDPyî Leyla Guvene va ‘nika kaosêk yeno awankerdene’ û wina dewam kerde: “Prosesê winasî de ganî vengê ma hîna xurt berz bibo. Şorişgêrî, demokratî, sosyalîstî, pawitoxê heqanê merdiman û her kes o ke çareserî wazeno, ganî qisey bikero û vengê xo berz bikero.”

Grevê vêşanî yo ke 8ê Teşrîna Peyêna 2018î de Zîndanê Tîpa E yê Amedî de rayberîya Parlementera HDPyî û Hemsereka KCDyî Leyla Guvene, bi talebê wedaritişê tecrîdî yo ke Rayberê Şarê Kurdî Abdullah Ocalanî rê yeno kerdene ameybî destpêkerdene, vilayê zîndanan û Tirkîya bîbî.

5 hezar ra zêdêrî hepsîyê PKK û PJAKî tewrê nê grevî bîbî û 200 rojan ra pey nê talebê çalakgêran ameybî ca û çalakgêrî ser kewtîbî. Guvene roja 79. ya çalakîye de ameybî tehlîyekerdene û keyeyê xo de dewamê xoverdayîşê xo kerdbî. Grevê vêşanîye yo pîl tena vilayê Kurdîstan û Tirkîya ney, vilayê çar hetê dinya bîbî. Menga peyêne ya xoverdayîşî de zî 30 hepsîyan çalakîya xo açarnaybî grevê mergî û xoverdayîşê xo wina domnabî.

Guvene derheqê babetanê rojeve de ANFyî qisey kerde. Guvene va ‘eşkera bî ke ma heqdar ê’ û wina dewam kerde: “Birêz Ocalanî hîna pêvînayîşê destpêkî de çîyê gelekî muhîmî vatî. Pêşnîyarê çareserkerdişî kerdî ke bi naye hilme daye sîyasetê Tirkîya. Ma eynî wextî de vatêne; eke Birêz Ocalan qisey bikero do rewşeka muhîme bivejîyo werte. Ma nika zî eynî fikrî de yê. Ma vînenê ke nika kaosek esto. Her roje gefî yenê werdene ke dest bierzê bi Rojawanî, cenazeyî yenê ardene û şer qewimîyeno. Ancîya wina her roje operasyonê qirkerdişê sîyasî yenê kerdene û bi seyan merdimî yenê girewtene. Derbe dîyaya hîrê şarêdarîyanê pîlî yê HDPyî ro û qayumî yenê tayînkerdene. Nika zî nêverdanê Birêz Ocalanî reyde pêvînayîşî serûberî bêrê kerdene. Eynî wextî de kenê ke kaosî vejê werte.”

‘Ganî vengê ma xurtêr berz bibo’

Guvene qala hêrişê ke vera Rojawan, keyeyê ke verê awanîya HDPyî yê Amedî de dîyayê roniştene û tayînkerdişê qayuman yewbîn ra girêdaye yê û tespîteko winasî kerde: “Prosesê winasî de ganî vengê ma hîna xurt berz bibo. Reyna seba ke ma nê meseleyan pîya hal bikerî, ganî ma îradeyekê xurtî nîşan biderê. Her çî ra ver zî ganî merdimî raştîye ra vaje‚ raşt a. Wexto ke ma wina kerd beno ke ma bibî hedef la ma do mesulîyetê xo yê tarîxî bîyarê ca. Ma mecbur ê ke na yewe bikerê. Şorişgêrî, demokratî, sosyalîstî, pawitoxê heqanê merdiman û her kes o ke wazeno Tirkîya pîl biba ganî qisey bikero û vengê xo berz bikero. Ma yew prosesê winasî de yê.”

Hêzê derbe do bikewo dewre

Guvene daye zanayene ke Tirkîya bi awayekê pozîtîfî aver nêşona û wina va: “Eke bi nê awayî dewam bikero, senî ke Birêz Ocalanî vatbî hêzê derbe do newe ra bikewo dewre. O taw Tirkîya çi rey do nêeşka tewrê Yewîya Ewropa biba û do nêeşka biba welateko demokratîk. Coka vurîyayîşeko bingehîn hewce yo. Rayîrê na yewe zî qanûno bingehîno newe yo. Bi serran o ke her partîya sîyasî ya ke bena îqtîdar vana ke ganî qanûno bingehîno newe bêro amedekerdene la nê karî nêkenê. HDP nika na meseleya girînge vînena û çarçewaya konseptekê prosesê neweyî yê edalet û qanûnê bingehînî de dîyarê gelek hêz û derdoran bena. No gelekî girîng o û ganî naye rê bereyî bêra kerdene.”

Eke 10 madeyî bigirîyî çiman ver, mesela hal bena

Guvene va ‘seba ke çarçewaya qanûnê bingehînî bêra dîyarkerdene eke 10 madeyê ke Birêz Ocalanî Mutabaqatê Dolmabahçe de dîyar kerdîbî bigirîyî çiman ver taw meseleya kurdan do hal biba’ û wina qedênaye: “Kurdî do bi ziwan, kultur û nasnameyê xo biciwîyê. Na yewe mumkun a û zaf cayanê dinya de esta. Ma vajê Rojawan nimuneyêk o. Rojawan de tena Kurdî çin ê, zaf şarê bînî zî estê. Pêrûnan pîya Sûrîyayêka demokratîke awan kerde. Seba ke dej bêro vindarnayene û seba halkerdişê nê meseleyan qanûno bingehîno demokratîk hewce yo. Ma do her şert û mercî de do destkewteyanê şarê xo bipawê.” n AMED