Dirbetin û cenazeyê ke 11 rojiyo bodrimê jew keyî yê Cizîr de manenê ra hîrê rojiyo zonayişî nînê giroten. Tewr peynî de, pêdiyayinê telefonî ra vengê tifing û qîrayişan ame.
Vengê tifingan û qîrayişan
Ablûqe û êrişê dewleta Tirk yê vera Cizîr roja 51. de yê. Dirbetin û cenazeyê ke 11 rojiyo bodrimê jew keye de yê ra hîrê rojiyo zonayişî nînê giroten. Tewr peynî de, parlamenteranê HDP yê ke Meclîs de grevê veyşanhi de yê, qeydê veng yê dirbetinan aşkere kerd. Qeydê veng de yeno fehmkerdiş ke, bado ke ambûlansî şinê dirbetinan bigîrê, vengê tifingan û qîrayişan berz beno.
Malbatê ke, waştî şirê cenaze û dirbetinanê xo bigîrê, dekewtişê Cizîr de vinderniyay. Vinderdişê komî rameno. Herzewbîn, gurekarê weşî ke hîrê rojiyo wazenê şirê Cizîr û mudaxaleyê dirbetinan bikerê zî, vetişê Mîdyat de amey manîkerdin. 14 gurekarê weşî ke bi fermanê walitî amey vindernayen, hewl danê ke ser raya Hezex ra dekewê Cizîr. La, raya dekewtiş û vetişê Şirnex û Cizîr hetê polîsan amê giroten.
5 cenazey hewadiyay nêweşxane
Heta bin ra, taxa Cûdî yê Cizîr de, kuçeyê Reyhan de vizêr 1’ya ci cenî, cenazeyê panc kesan hewadiya nêweşxane. Kamiya panc kesan hona aşkere nêbî, la goreyê zonayişan, nê panc kesî hetê qûwetanê dewlet amey kişten.
Nêweşxane açarnay îşkencexane
Şirnex de çeteyê dewleta Tirkî zaf hûmarî de kesî ya qetil kerdî, ya zî dirbetin kerdî. Dirbetinê ke şîyî nêweşxaneyî, terkê merdiş bî. Goreyê xebera Samara Îzgîn’î Nêweşxaneyê Dewlet yê Şirnex’î ra kesekê wezîfedar aşkere kerd ke, sekreterê pêroyî yê Nêweşxaneyê Dewlet yê Şirnexî Hasan Tokur, mudirê Nêweşxaneyê Dewlete yê Şirnexî Samî Zeyrek, verpirsîyarê morg û yewineyê pawitişê sivîlî yê Nêweşxaneyî Selîm Ertaş dirbetinê ke nêweşxaneyî ra yenî ardiş ra zilm kenî. Goreyê xeber “nê kesî dirbetinan ra persê zey ’xendekan de çend kesî estî, xoverdayîşan kam organîze keno’ persenê. Wexto ke dirbetinî cewab nêdano persan, dirbetinan rê heta merdiş îşkence kenê.
Nûmayişa Grêmîran ramena
Serva wayirvetişê xoverdayena Cizîr, nûmayişa Kurdistanijan ya Grêmîran ramena. Nûmayişa Nobed ke qezaya Mêrdîn Nisêbîn de ramena de, cuwyayişê komunal ame ronayen. Nûmayişkaran komîteyê weşî, tîvarî, perwerde û pakî ronay. Pêrokîn nûmayişkarî, wezîfeyê xo bi waştena gird anê ca. Nûmayiş de, bi dorveger nobed yena giroten, mintiqe şew û roj bin qontrol de ya.
DÎHA/ŞIRNEX
Gever zî YPS îlan kerd
Deste êrişanê dewleta Tirk, şarê Kurd sûk bi sûk, qeza bi qeza, pawitenê cewherî keno gird. Tewr peynî de, qezaya Colemerg Gever de zî YPS ame îlan kerdin.
Bi aşmano, dewleta Tirk sûkanê Kurdistan de qetlîaman viraziya, erzena Kurdan ser. Vera êrişanê dewlet, xoverdayişê Kurdan zî her ke şino beno berz. Badê Cizîr, Sîlopî, Nîsêbîn û Sûr qezaya Colemerg Gever de zî Yekîneyê Parastina Sivîl YPS ronayişê xo bi merasîmeke îlan kerd.
Xorayverînan paweme
Fermandarê YPS ê Gever Êrîş Gever Merasîm de qiseykerd û vist vîrî ke, bi serrano dewlet bi êrişan cewab da waştena haştî yê şarê Kurd û înan qetil kerd. Gever da zonayene ke, no 6 aşmiyo, AKP Kurdistan de operasyonanê îmha û înkar ramena û wina va: “Zey gencê Gever ma dê vera tanq û topanê AKP herb bikerê, pawitena cewherî xort bikerê û wayrê xorayverînê ke hetê şarê Kurd amey îlan kerdin vejerê. Fermandar Êrîş Gever aşkere kerd ke, heta ke cuwyana azad bîro înşa kerdin, ê dê xover bidê û xeyalê Memyan, Rozerîn, Herekol û Dîyaran biyarê ca.
DÎHA/COLEMERG