Çarçoweyê hemleya Xezebê Firatî de lejwanê ke seba azadkerdişê Reqa kewtbî rayîr, xeylê dewan destê DAIŞî ra xelesnay.Cinîyê ke destê çeteyan ra xelesîyay zî aşkere kerdî ke hewrê sîyayî vila bîyî tîje akerde. 

Şerwanê ke seba azadkerdişê Reqa 10ê kanûne de Hemleya 2. yê Xezebê Firatî daybî destpêkerdiş, averşîyayîşê xo domnenî. Fermandarîya Odeya Çalakîyan ya Xezebê Firatî aşkere kerd ke ciwanê ereb, suryanî, kurd û sewbîna yê ke dextê çeteyan ra remayî, înan reyde têkoşînê xo danî. Çarçeweya operasyonî de heta nika xeylê çeteyî ameyî kiştiş, la ti vînîbîyayîşê şerwanan nêbîyo. Yeno dîyayîş ke şerwan zaf bitedbîr operasyonî domnenî.

Firinî amade yî

Hemserekê TEV-DEMî Ehmed Şêxo ke derheqê ca ardişê hewcedarîyanê şarî de qisey kerd wina va: “Kapasîteya firinê ke Kobanê de yî ameyê zêdekerdiş û ma eşkenî seba çend rojan şarî rê bi hawayo bêpere nan temîn bikerî. Goreyê dewê ke bêrî rizgarkerdiş, do 3 firinê bînî zî bêrî akerdiş. DAIŞ bi zanayîş vatişanê ‘kurdî do dewijan qetil bikerî’ vila kerdêne, labelê şarê tîya na propagandaya DAIŞî veng vet. 

‘Şima kura de mendî’

Endamê TEV-DEMî Mihemedê Hewêyo ke 11 serrî yo herême de cuyeno zî hîsanê xo bi nê vatenan ard ziwan: “Raştîya xo de kalikê ma xeylê reyan ameyî dewanê Reqa. Hetta nameyê zaf dewan zî hetê kalikanê ma ra ameyo panayîş. Labelê bi ameyîşê rejîmê Baasî dewijî êdî nêşînayî ke koçerî bikerî. Erebê ke herême de cuyenî her çiqas ke DAIŞ û hêzê rejîmî propagandaya xirab kerdî zî, reyna zî vera kurdan de dişmenî hîs nêkerdî; çimkî wexto ke ma ameyî, dewijan va, ‘şima kura de mendî.’”

Kêmî nêbeno 

Dewê ke verê cu bin zilmê DAIŞî de bî, domanê nê dewan wexto ke wesayîtî derbaz benî nîşaneyê serkewtişî kenî û silam danî înan. Her dewa ke ma şonî, heme dewijî la bitaybetî cinîyî bi tîlîlîyan TEV-DEMî pêşwazî kenî. Dewijî qala zilmê DAIŞî kenî û wina vanî: “Wexto ke DAIŞî dewanê ma dagir kerd, heme cayan reyde têkilîya ma qut bî, heme çîyî ma rê heram bî; çi domanî şînayêne şêrî mekteb, çi zî ma şînayêne şêrî doktor.” Dewa Marwanî ra dewijêk zî vano ‘Nêverdayî ke ma kurdan reyde têkilî bironî, domananê xo bierşawî mekteb û ma nêşînayêne ke şêrî nêweşxane.”

Ma hepisxaneyî ra vejîyayî

Cinîyê ke dewa Cabîrî ra yî zî bi tîlîlîyan heyetî pêşwazî kenî û wina vanî: “Ameyîşê lejwananê QSD ra dima hewrê sîyayî ma ser ro vila bîyî, ma ser de tîje akerde û hewrê sîyayî herinda xo roşnîye rê verdayî. Ewro roja ke ma hepisxaneyî ra vejîyayî yo. Wexto ke ma bin zulmê DAIŞî de bî, ma nêşînayêne merdimanê xo daxî zîyaret bikerî. Heme çî qedexe bî û heme têkilîyê ma qerifnaybî.” Tewr peynî dewijî nê detayan dayî: “DAIŞî bi her hawayî zulmê ma kerdêne. Mesele o wext varîlê mazotî ke 200 lître yo, Kantonê Kobanê de 9 hezar lîra bî, la dewê ke destê DAIŞî de bî, ewjayan de 40 hezar lîrayî ameyêne rotiş.”


ABDURRAHMAN GOK / DÎHABER / REQA