Wextê hukmatê AKPyî de sîyasetmedar, rojnameger, huqûqnas û akademîsyenî zî tede xeylê kesî bin nameyê ‘Operasyonê KCKyî’ de ameyî tewqîfkerdiş. Nê operasyonan ra yewe zî vera çapemenîye de ameybî viraştiş. Operasyono ke 20ê kanûna 2011 de dest pêkerdbî û çarçeweya nê operasyonî de 46 rojnamegerî ameybî tewqîfkerdiş. O wext rojnameyê ke nizdîyê cematî bî, dosya verapey kerdêne û nameyê ‘Teror Press’ de vila kerdêne.
Heme tewqîf bî
6 aşmî dima ra Dozgerî derheqê nê 46 kesan de bi îdîaya ‘endamê rêxistine’ û ‘propagandaya rêxistine’ de îdîanameyêka 800 rîpelan ra pê yena, amade kerdbî. Her çiqas ke 5 serrî ser doze û mehkemekerdişî ra vîyarto zî hîna zî mehkemekerdiş netîce nêbîyo. Heme dozger û hakimê ke derheqê rojnamegeran de qerar dayî, OHALî ra dima ameyî tewqîfkerdiş û wezîfe ra ameyî girewtiş.
Rojnameger û şahid
Rojnameger Çagdaş Kaplano ke sucdar, mexdur û şahidê dozî yo û doze ver 13 aşman tewqîfkerde mend û dima ra ame veradayîş, babete ser o qisey kerd. Kaplanî va ‘heme xeberî û munaqeşeyê xeberan seyî suc amebî dîyayîş’ û wina domna: “Polîs, hakim û dozgerê Fetullahî amebî wezîfedarkerdiş û sey makîneyê sucî xebetîyayêne. O wext zî ma vatbî ke no mehkemekerdiş nîyo. La dima ra wexto ke şîrikîya cemat û AKPyî qedîya, dozger û hakimî sey çete ameyî dîyayîş û tewqîf bî. Ewro her çiqas ke nê dozger û hakimî bi îdîaya endamê terorî ra yenî mehkemekerdiş zî doza ma netîce nêbîya. Ganî doze betal biba.”
DÎHABER / STENBOL