Dezgeyê hetkarîye Heyva Sor a Kurdistanî ke heta nika xeylê reyan bi hetkarîyanê cîya-cîyayan hetkarîye daya bi mîlyonan kesan, bi wesîleya aşma Remezanî, kampanyaya fitre û zekatî daye destpêkerdiş.
Heyva Sor a Kurdistanî keyepelê xo ser ro bi îzehetêkê na kampanya aşkere kerda. Heyva Sorî îzehetê xo de vato ‘çîyê ke aşma Remezanî de nêrî vîrîkerdiş ra yewe zî hetkarîye dayîşê merdimanê feqîran o’ û wina domnayo: “Hêriş û dagîrkerîya artêşa tirk û çeteyanê ci ver bi sehezaran merdimî mecbûr mendbî koç bikerî û nika nê merdimî binê şert û şurtanê xeylê giranan de cuyenî. Ganî ma nê merdiman xo vîra nêkerî û tena nêverdî.”
Heyva Sorî dewamê îzehetê xo de wina vato: “Reyna dewleta tirkî hêrişê Vakurê Kurdistanî kerdbî û vakur de xeylê bajaran açarnayî xirabe û şarê ma yê herême her wextî ra hîna zafêr lazimîya înan bi hetkarîye esta. Ganî ma lazimî û hêvîyanê şarê xo bîyarî ca û birînanê înan bipêşî. Bêrê ma wezîfeyê xo yê aşma Remezanî bîyarî ca û hetkarîya merdimanê muhtacan bikerî. Şima eşkenî fitre, zekat û sedeqeyanê xo bi rayîrê Heyva Sor a Kurdistanî bierşawî şarê ma yo ke Efrîn ra koç kerdo û şarê ma yê ke banê înan Nisêbîn, Gever, Sûr, Cizîr, Şirnex, Hezex û Silopî de ameyî rijnayîş rê. Fitre 10 Euro yo.
ANF/KOLN