Endama Meclîsê Ciwanan yê HDPyî Hulya Demîre derheqê tecrîdo ke Rayberê Şarê Kurdî Abdullah Ocalanî ser o dewam keno û çalakîyê grevê vêşanîye ser o qisey kerdî, bale ante bêvengîye ser.
Demîre va ‘tecrîd ra heme komel tesîr beno’ û wina domnaye: “Ewro beno ke tecrîd tena Rayberê Şarê Kurdî ser o yeno domnayene, labelê tecrîd sey polîtîkayêk heme şaran ser o yeno bicaardene. Kurdîstan de no sey polîtîkaya qirkerdiş û asîmîlasyonî vejîyena vernîya ma. Tecrîd polîtîkayanê cinîyan de zî vejîyena teber. Zîndanî merdiman reyde pir bîyî.”
Demîre bale ante hêrişê polîsan yê Gebze û Qoserî ser û wina va: “No zî tecrîd o. Ma verê cû qala şîddeto ke serranê 90î de bîyêne kerdêne, labelê êdî kes qala ci nêkeno. Çimkî êdî ma yew bi yew şîddet, zext û hêrişanê serranê 90î cuyenî. Wedarnîyayîşê tecrîdî yeno manaya ameyîşê aştî û demokrasî. Kesê ke nînan wazenî zî yenî tecrîdkerdene.”
Hêzo ke tecrîdî biqedêno ma yê
Demîre daya zaneyene ke înan qet dewlete sey hêzê çareserîye nêdîyo û wina va: “Eke dewlete çareserîyêk bivîno zî no yê dewlete nîyo, netîceyê xoverdayîşê Leyla û yê hepsîyanê bînan o. O ke no het de zor bido dewlete şar bi xo yo. Gere şar xover bido û dewlete ser de ferz bikero. Dewlete vana qey eke rolê meymûnan kay bikera, eşkena kurdan bêveng bikera. Labelê hertim eksê ci beno. Ma do waştişanê Leyla û yê hepsîyanê bînan bica bîyarê. Hêzo ke tecrîdî biqedêno, ma yê. Ma eşkenî serbikewî.”
JINNEWS / AMED