Hînê bes o, heyana ewro AKP çi kerd û înan rê kar mend. Verê verkan bi rewşa eşkeraye ra qirkerdişê Roboskî viraşt. Labelê heyana ewro hema zî hesabê qirkerdişê Roboskî nêdayo û nêdana zî. Pirsûste qirkerdişê 33 ciwanan viraşt ancî rayna zî hesab nêda. Raşteyê Îstasîyonî de qirkerdiş viraşt ancî zî faîl raşte de çinî yo.
En qirkerdiş o gird zî Enqere de Mitînga Aştîye de viraşt, ancî zî raşte de faîl çinî yo eynî hewayê qirkerdişê Pirsûsî hesaban ra faîl yew qetilkarê DAIŞ nawit. Ewro zî emanetger hesaban ra Serekwezîr Davutoglu vano; nê heme faîlê nê qirkerdişan ma tespît kerdî û tepiştî. Yanî no hewa zûrkerey û pîşkîney ra dinyayî de no hewa yew namerd çinî yo.
Qirkerdiş virazenî la hema zî HDP sûcdar kenî
Eke heyana ewro faîlê nê qirkerdişan dîyar nêbîyo se, her wext faîl qetilkar AKP a. No hewara yo ke, Davutoglu vano; ma heyana ewro heme qetilkarî tespît kerdî û tepiştî.
Ewta de bi rewşa aşkeraye ra Davutoglu qetilkareya xo daya dest. Çimkî vano; heyana ewro faîlê nê qirkerdişan nêmendo ma pêyro tepîştî. Senîhewa nê qetilkarî tepiştî peyê qetilkaran de kamî bîyî û no warî yew tena aşkeraye çinî ya? O wext heme hîrê faîlê qirkerdişan de qatîl AKP a. AKP hînê nêeşkena ke xo nê qirkerdişan ra xo bixelisno. Enqere de qabê asayîşî ra mîrçike bîle bêy dewlete nêeşkena ke bifiro. Senîhewa bêy dewlete ra nê qirkerdişî bena?
No hewa hînê alçaxey dinyayî de çinî ya. Hem raşteyê Enqerye de qirkerdişê hovanî virazenê, hem zî HDP sûcdar kenê. No senîhewa yew dewlet a yew milet a û yew zîhnîyeto?
Hînê qet nêeşkenê nê hesabê namûsî û xîretî bidê
Wa her kes hişê xo bigîro sereyê xo û wa nê qetilkar AKP dime nêşoro û paştî nêdî. Na zî bi rewşa eksî ra înî ke paştî û destek danê nê qetilkar û munafiq AKP hînê êzî sûcdarê nê qirkerdişan AKP o. Kurdê ke heyana ewro paştî û destek dayo AKP eke hînê ruhê înan de eke têkê û misqaleq namûs xîret mendo se ganî ewro ra pey nê qetilkar AKP terk bikerê. Sewbîna tewr zî hînê qet nêeşkenê nê hesabê namûsî û xîretî bidê. Heyan erey nîyo wa nê namûsê xîretê xo safî bikerê. Nazî nê bêxîretî hînê welatê Kurdistan de cayê înan nêmaneno.
Vergirewtişan bigirewtênê do qirkerdişî nêbîynê
Enka zî hînê wextê şînê nîyo hînê wextê xoverodayîşî yo. Eke heyana Wezîrê Karanê Zereye û serekwezîr îstîfa nêkerdo se, ganî şarê tirk û kurd şew û roj payra bo û xoverodayîşê xo dewam bikero. Sewbîna tewr zî kurd hînê hewayê mêşna qûrbanî nîyo.
Eke heyana ewro hesabê qirkerdişê Roboskî, Pirsûsî û hesabê qirkerdişê Amedî de hesabê qirkerdişê 5’ê hezîrane bipersîyanê se, hînê ewro zî nê qirkerdişê Enqereye nêbîynê.
No warî de AKP hînê rê girot çikerd se înan rê heme qirkerdişî kar mendî. Hînê ewro zî bes o.
Ganî hînê hewayê verî AKP estora xo hewayê xo xar nêdo. Hînê ganî ewsarê estora AKP bitepîşî yo. Çimkî AKP bi verên ra vinîkerdişê weçînayîşî ra tersena û dîyine zî aştî ra, pêameyiş ra tersena.
Planê AKP nêtepiş
Tayyêp Erdoganî û AKP waşt ke nê weçînayîşê 1’ê Teşrîne de qaos û têmîyanî bivirazê û dek û dolaban reyde bi tena îqtîdar bibê. Bi verên ra AKP zaf cayê hereman de cayê asayîşî îlan kerd û waşt ke weçînayîşî de sindoqan hewanê û berê sewbîna cayan.
Labelê nê planê AKP nêtepişt. Nay ra zî KCK heyana 1’ê Teşrîne bêçalakîtî îlan kerd. Labelê no warî de hem Tayyîp û hem zî şûraqaya ey AKP nê bêçalakîtîya KCKe qebûl nêkerd û vat; ma heme tewr ra operasyona virazenê. Çimkî KCK, AKP dest ra yew çeko gird vet û no weçînayîşî de AKP bêçek mend. Nay ra zî AKP har bîya û Enqera de qirkerdişo gird viraşt. Labelê na ray hînê Tayyîp û şûraqaya ey AKP nêxelisîyenî. Na ray Tayyîp balte nacax da destê û liganê xorî.