Ganî no ziwan sey ziwanê fermî şaristan û metropolan de vajor bo.
Ma kurdî wayîrê ziwanêkê xoserî yî. No ziwan heme warî de ma rê qêmî keno. Hayîya ma est a ke no ziwan ma rê qêmî keno û şarê ma zî na babete ser ro denêkewî şik, zereyê înan rehet û asan bo. Eke ziwanê ma bibo ziwanê fermî metaryalan hadrekerdişî de perseyê ma çin î. Beso ke behê înan ca de bo û xo hîra bitepişî. Xora vera vera metaryalê dibistanan hadre benî. Hinî qedroyê ma nê warî de est î. Çew xo nê hetî de etirîyaye nêvîno. Kurdî hetê zanayîşî ra ziwanê xo ser ro şênî texirîyayîşê xo bivajî. Û şênî texirîyayîşê xo pratîze zî bikerî.
Ziwanê ma na erdvînayîye de ziwanê perwerdeyî nîyo la hetê zarawaya kurmanckîye henzaran vêşêr kîtabî çap bîyî. No zî çîyêko dewlemendî yo. Bitexiriyî ziwanê to ziwanê fermî nîyo. La her serre desan ra vêşêr kîtabî vejîyenî. Na hawa no ziwan vînî beno? Ziwanê ma rewna ziwanê vajeyî bîyo.
Û ma zaf şa yî ke hetê zarawaya dimilkîye de zî têgêrayîş est o. A zî cayê xo nêvinderena û werişta pay, hinî linganê xo ser ro vinderena. Zarawaya dimilkîye de zî heyanê nika se ra vêşêr kîtabî vejîyayî. Û nê di serran de zî yew va girewto desan ra vêşêr kîtabî çap benî û yew alaka zî vînena. Ma beh kenî ke na hawa zarawaya dimilkîye biramîyo xo tengayî û vînîbîyayîşî ra reynena. Xora tîya de ziwanê kurdî de perwerde bibo di zarawayan ser ro beno. Ferasetê ma o yo ke wur dî zî sey birayê yewbînan pîya biciwîyî û pîya xurt bibî. Yew aver, yew tepa nê, wur dî zî xurtbîyayîşî de paştî bidî yewbînan. Ma heme warî de cîyayîyanê xo dewlemendîya xo vînenî. Zarawayê ma sey seyyewbîyaye rayîrê xo de şîrî.
Hinî kurdan mergî xo ser ro eşta, xo ganî kerda. Seserra vîstî peyê xo de ver ra daya, vernîya xo ra ewnena û na vernîya xo de tesil bextê xo bivurno. Heme perseyanê xo mîyanê xo de qewetê xo reyde çareser bikero. Hinî paweyê sewbîna mîletan nêvinderî. Eke naka xo ma birnenî o wext ma paweyê yewî nîyî. Ma paweyê xo yî û ma key hadre bibî ma şimşêr danî gireyê gordîyonî vernîya xo akenî. Vernîya laserê azadeyî ra çew eşkeno bivindero?
Seserra vîst û yewîn ko zaf çîyan bivurna. No vurnayîşî de kurdî zî ko cayê xo bigêrî. Eke no vurnayîşî de kurdî ca bigêrî no sey lutûf nê, têkoşîndayîş reyde, bedeldayîşî reyde bo. Kurdî zî no rewna heq kerdo û ko no heqgirewtişî de heme kes rêz bibo.
Ma hinî paweyê ke ziwanê ma key perwerde bivîno? Ma hinî tehdayî û zulmî ra vîyartî. Ma hinî paweyê ke kamder wext tutanê xo eşrawenî dibustananê xo? Ma hinî mezgê xo nê çîyan ser ro bixebitnî. Vernîya ma de no est o û ma nika ra qedroyê xo temam bikerî. Wa meşte erey nêbo. Nika ra destbidekerdiş lazim o.