Bi taybetî teşebusê derbe yê 15ê temuze ra dima yê ke hetgirê qesre û AKP nîyî bi Qerarnameyanê Hukmê Qanûnî, karî ra yenî eştiş. Mîyanê nê kesê ke karî ra yenî eştiş de sifteyîn endamê Konfederasyonê Sendîkayanê Kedkaran yê Şarî (KESK) estî. Nînan ra beşa Egîtîm Senî ya Riha ra zî nizdîyê 500 kesî karî ra îxraç bîyî. Babete ser o Hemsereka Egîtîm Senî ya Beşa Riha Dîlek Çakiltaşe qisey kerde.
Nobet domîyeno
Çakiltaşe va teşebusê derbe ra dima, sey ke KESK derbe viraşta, rastê hêrişan ameye û wina va: “15 temuze ra dima 10 hezar û 200 kedkarî karî ra ameyî eştiş û nînan ra 462 kesî zî Riha de karî ra ameyî dûrvistiş û nînan ra 23 kesî zî ameyî îxraçkerdiş. Ma sey sendîka piştî danî embazanê xo. Zîyaret û çalakîya nobedî ke seba piştîdayîşêyewbînanî yenî kerdiş, domîyenî. Dewlete wazena sazî û dezgeyê ke seba cuyêka hîna baş têkoşîn danî, bivindarnî û vengê înan bibirnî. Heta nika yew endamê ma ra daxî îfade nêameyo waştiş û no zî nawneno ke huqûq wedarîyayo. La ma zanî ke ma do nê prosesî ra hîna bihêzêr bivejyî.”
‘Wa domanî nêmirî
Çakiltaşe qiseykerdişê xo wina qedênaye: “Ma seba ke domanî nêmirî û bişînbî şêrî mekteb, yewe roje fek karî ra veradaybî. Ewro nêyî kenî mehne û embazanê ma karî ra erzenî. Ma do hem zereyê welatî de û hem teberê welatî de têkoşînê xo bidomnî. Eke huqûqo mîyanên biqedîyo, ma do heta Ewropa şêrî. Ma heta nika welatêko demokratîke waşt û ma do nika ra pey zî nê waştişê xo bidomnî.” n ANF/RIHA