Taxê Lalebey û Alîpaşa yê qezaya Sûrî ya Amedî de rijnayîş dewam keno. Bitaybetî Alîpaşa de merhaleyo 1. yê rijnayîşî qedîyayo û nika herinda rijnayîşan de bingeyê awanîyê ke do bêrî viraştiş, yenî eştiş. Şarê taxe zî vera rijnayîşî de taxe nêterikneno.
Babete ser o Verfeka Platformê Rijnayîşê Sûrî rê Nê Buşra Cîzrelîogullariye qisey kerde. Cîzrelîogullariye arde ziwan ke planê neweyî yê hukmatî estî û qaso ke ma eşnawito Planê Îmarî yê Seba Pawitişî do bêro newekerdiş.
Cîzrelîogullariye va ‘bi sebebanê cîya-cîyayan ver seba ke Planê Îmarî yê Seba Pawitişî bibedilnî, îlan dayî’ û wina domnaye: “Beşa ke heqê ci de îlan dîyayo mîyan de qismêkê yê Alîpaşa û Lalebeyî zî esto. Serra 2012î de Şaredarîya Bajarê Girdî û ya Sûrî bi beşdarbîyayîşê xeylê mîmar, muhendîs, sosyolog, arkeolog û sewbîna meslekan ra kesan Planê Îmarî yê Seba Pawitişî amebî amadekerdiş. O wext seba pawitişê kulturê Sûrî plan amade bîbî. Labelê nika melumat nêdîyayo ti kesî û no zî ma etirneno.”
Îhaleyî rayapêroyî ra yenî nimitiş
Cîzrelîogullariye dîyar kerde ke nika Planê Îmarî yê Seba Pawitişî ameyo bedilnayîş û dîyayo îhale û wina va: “Beno ke netîceyê giranî yê nêyî bibî. Nika dormeyê Alîpaşa ameyo girewtiş û ewja de kinitiş esto. Nika kinitişê çi yeno kerdiş? Planêkî dîyayo îhale û hedefê nê planî çî yo, ti kes nêzano. No herkes ra yeno nimitiş. Grûbê ke nê îhaleyan gênî zî şahidîya nê qetlîyamî kenî.”
MA/AMED