Kovara Vateyî ke serra 1997î ra nata bi hawayo nîzamin vejîyena, nika zî hûmara 50. ya kovara Vateyî vejîya. Sey her hûmare muhtewaya na hûmare zî bi roportaj, nuşte, şîîr û sewbîna pirr o.
Hûmara 50. ya kovara Vateyî de bi serredaktoranê kovare Munzur Çemî reyde roportajêk ameyo viraştiş. Reyna na hûmare de derheqê kovare de fikrê nuştox û wendoxan ameyo girewtiş û ca dîyayo nê fikran. Reyna derheqê nuşte û nuştoxanê Vateyî de nuşteyêk yê J.Îhsan Esparî zî na hûmare de ca gêno. Heto bîn ra na hûmare de derheqê mewlidê Ehmedê Xasê de beşê dîyinî yê nuşteyê M. Selîm Uzunî esto.
Guven Yeşîlî şaîrê namdarî Silo Qizî reyde roportajêk viraşto û no roportaj zî hûmara 50. ya kovara vateyî de ca gêno. Sewbîna zî meqaleyê Murad Canşad, Mehmud Nêşite, Newzad Valêrî û Huseyîn Karakaşî kovare de estê. Reyna Denîz Gunduz û Pinar Yildize zî bi şîîranê xo beşdarê na hûmare benê. B. Şîlane zî tekstê xo yê mîzehî na hûmare de ca gêna.
AMED