Kovara Vateyî ke serra 1997î ra nata bi hawayo nîzamin vejîyena, nika zî hûmara 53. ya kovara Vateyî vejîyaye. Kovara Vateyî ke averşîyayîş û standardbîyayîşê kirmanckî de wayîrê rolêko muhîm a, heta nika bi hûmaranê erjîyayeyan weşanê xo domnaye. Kovara Vateyî yewna rey bi muhtewayêka debîyaye yena wendoxan ver. Sey her hûmare muhtewaya na hûmare zî bi roportaj, nuşte, şîîr û sewbîna pirr o.
Sey hûmara 52. ya Vateyî, na hûmare de zî ca dîyayo eserê ke beşdarê Musabeqayê Vateyî ke netîceyê ci Amed de aşkere bîbî. Seke yeno zanayîş hûmara 52. de ca dîyaybî eserê ke musabeqa de bîbî yewin, na hûmare de zî ca dîyayo eserê bînî yê ke beşdarê musabeqa bîyî. Bêxera nê eseran ca dîyayo sanik, analîz, şîîr û sewbîna çîyan. Hûmara 53. ya Vateyî de Redaksîyonê Vateyî derheqê muhîmî û muhtewaya kovare de nuşteyêk amade kerdo û nuşteyê redaksîyonî wina yo: “Wendoxê delalî,
Amadekerdişê hûmara 53. ya kovara Vateyî, rastê kombîyayîşê Grûba Xebate ya Vateyî yê hîrisinî ame. Grûba Xebate ya Vateyî na hewe Kurdistanê Başûrî de, bajarê Dihokî de kom bîye. Grûbe, donima verên a ke Kurdistanê Başûrî de kom bena. Kombîyayîş mabênê tarîxanê 27.07.2017-31.07.2017 de bi. Grûbe çend kombîyayîşanê xo yê peyênan de termanê şaredarîye ser o gurîyaybî, kombîyayîşê 30. de zî na babete ser o xebata xo domnaye.Bêguman her kombîyayîşê Grûba Xebate ya Vateyî averşîyayîşê kirmanckîya (zazakîya) standarde de gamêda muhîm a. Ewro ma vîneme ke problemê rastnuştişî kirmanckî hîna kêmî bîyî, fehmkerdişê gramerî de zanayîşê ma hîna zîyade bîyo û ferhengê ma de des hezarî ra vêşêr çekuyê bingeyî yê stnadardî estî. Ma bawer kenîme ke ehemîyetê nê karî ewro hîna vêşî wendox û nuştoxê kirmanckî zanî la siba gama ke ziwanê ma bibo ziwanê perwerdeyî qedr û qîymetê nê karî hîna weş fehm beno.Wendoxê delalî, Na hûmare de şima verê netîceya Kombîyayîşê Vîst û Newinî bi fotografanê Firat Aygunî vînenî. Seke şima vînenî nê kombîyayîşî de gelek çekuyî munaqeşe bîy, gelek qerarî gîrîyay û bi inahawa ziwanê ma tayê waranê xaman de hîna dewlemend bîyo. Ma hûmara 52. de nuştibi ke ma eseranê Xelata Kovara Vateyî heta rêza pancine pêdima weşanenî. Na hûmare de şima hîkayeya Hesen Polatî, “Nan û Zeytunî”, hîkayeya Ali Aydin Çîçekî “Raywan” û hîkayeya Îsmet Borî “Ê Ke Pey De Manenê” wanenî. Şîîra rêza dîyine ya Qemer Erdoganî “Şêmiga Emrî” û şîîra rêza hîrêyine ya Umer Barasiyî “Dijeyê Pistanan” zî na hûmare de ca gênî. Eseranê Xelate ra teber yewna şîîra ke ma na hûmare da weşanenî, şîîra Pinar Yildiz “Vena” ya.
Roportajê na hûmare yê Munzur Çemî yo. Ey 30ê nîsana 2016î de, Îstanbul de “Ana Sultan”a xozatije reyra qisey kerdo. Roportajî de ca dayo tekstê yew beyta “Ana Sultane” zî. Ma hêvî kenî ke şima nê roportajê balkêşî ra îstifade kenî. Na hûmare de ma ca dayo di sanikan zî. Îhsan Tektaşî fekê dapîra xo ra sanika “Waya Hîrê Birayan” nuşta û Turabî Kîşînî zî fekê Pakîşa ra yew versîyonê sanika “Alik û Fatike”. Şahap Laçînî kitabê Deniz Gunduzî “Hîkayeyê Koyê Bîngolî” ser o yew analîz nuşto, Îsmet Borî mintiqaya xo ra rîpelê “Fiqra û Meseleyan” rê yew mesela nuşta.
Sey qala peyêne ma wazenî vajî ke mela şima wendişê Vateyî ra yew tehm û lezet bigîrîn!
Heta hûmara bîne bimanê weşîye de!”
MERKEZÊ XEBERAN