Mehkemeya Heqê Merdiman yê Ewropa (AÎHM) verê cû cemxaneyan statuyê cayê îbadetî de qebul kerdbî û no het de Tirkîya mehkûm kerdbî. Her çiqas ke qerarêko winasî yê AÎHMî esto zî Şaredarîya AKPyî ya Gurgumî hema zî cemxaneyan statuyê ‘keyeyê şînî’ de qebul kena. Elewîyî çend rojî verê seba ke Komeleya Kulturê Elewîyan yê Terolarî biakerî, muracatê Masaya Komeleyan kerdbî û muracatê xo de waştbî ke cemxaneyo ke dewa Terolarî zî sey merkezê komele nîşan bidî. Labelê seba ke cemxane qeydê şaredarî de sey keyeyê şînî derbaz beno, nêame qebulkerdiş.
Qerar samîmîyetê înan nîşan dano
Îdarekarê Komeleya Kulturê Pîr Sultan Abdalî yê Gurgumî Salman Akdenîzî reaksîyon nîşanê qerarê Şaredarî da û wina va: “No qerar girêdayeyê zîhnîyetê pêroyî yo. Cemxaneyo ke dewijan bi destê xo viraşto, statuyê ‘keyeyê şînî’ de yeno dîyayîş û no zî dewamê polîtîkayê înkarî yo. Hukmato ke komxebatê elewîyan virazeno û bi no hawa pesnê xo dano, derheqê cemxaneyan de waştişê tewr maqulî yê elewîyan nêvîneno. Seba ke şaredarîye wina nizdî bena, ma nêeşkenî komeleya xo biakerî, xebate ma dewam kena.“
DÎHABER/GURGUM