Fermandariya Cendirmeyî yê qezaya Çewlig Azarpêrt, semedê dayişê îfade Hemserokê qeza yê HDP Metîn Keçaş silayînê cerdirmeyî kerd. Ser nay, Keçaş 25ê Adar de semedê îfade dayiş şi cendirmatî. Metîn Keçaş’î da zonayen ke cendirmatî de çend polîsê ke vatî ma Çewlig ra yê ey berdî odeyê cipersayiş û hina dewam kerd: “Jew polîso por sipî û bi erdişî bi vatişê ‘ya ti bi ma ra gureyînê ya zî ti şinê girotxane’ destpa tehdîdan kerd”.
‘Cuya to qedîneme’
Îdarekarê HDP Metîn Keçaş’î vist vîrî ke cipersayiş de polîsan ey ra waştena ajancitî kerdo û bi girotxane tehdît kerdo. Keçaş’î qiseyê xo hina ramit: “Zey embazanê to yê bînî, jewîra vanime derheqê to de zî îfade danime dayiş û erzenime girotxane”.
Metîn Keçaş’î aşkere kerd ke ey cipersyayiş de vato ‘heta na roj mi ti sûc nêkerd, sabiqayê mi çinya, mi gureyînê îlegal nêramit o’. La polîsan cewabê ‘ma cuya to qedîneme. Biewnî ma senî ke Yilmaz Dîrek’î, Selîm Guvenç’î, Tûncay Dîrek’î, Aga Orunç’î, Mesût Kaya’yî rişt girotxane, to zî rişneme înan het.
Gereyê sûcî
Metîn Keçaş’î aşkere kerd ke, polîsan heta keyeyê ci, ey taqîp kerdo û zextê psîkolojîk ramito û vist vîrî ke însanan ebi nî şantaj û tehdîdan kenê ajan. Keçaş’î da zonayen ke, badê biyayiş ey serpirodayişê Komeleya Heqê Merdiman kerdo û derheqê polîsan de gereyê sûcî kerdo.
DÎHA/ÇEWLIG