Kombîyayişa ke bana DBP yê Amed de virazîya Tûncel ra pîya Hemşaredarê Sûka Pîl yê Amed Gultan Kişanak, Firat Anli, Hemserokê Jûbîyena Şaredarîyanê Demokratîk Tûncer Bakirhan kî tewr bî.
Sebahat Tûncel aşkere kerd ke AKP dûştê DBP şîdetekê sîstematîk ramena û vist vîrî ke xêlê hemşaredarê înan ameyê tepiştiş û heqê weşî yê alwozanê înan destê ci ra ameyê girewten. Tûncel aşkere kerd ke 2 Azayê Meclîsê Partî yê înan ameyê qetilkerden û hona Îdarekarê DBP yê Şirnex Hûrşît Kulter ra xeber nîna girewten.
Wa mufetîşî şirê Stenbol, Enqera
Hemseroka DBP Sebahat Tûncel da zonayene ke bi serrano sûkanê Kurdistan de partîyan xîzmet nêkerd û nîya va: “Amed ra pîya şaredarîyanê ma projeyê girdî ca ardî, nayî ra bîyê hedefê AKP. Her firsetî de şaredarîyanê ma kenê hedef, êriş kenê. Serra peynî de mufetîşî şaredarîyan ra nêvejyenê. Wa nê mufetîşî şirê
AKP bi polîtîkayanê faşîzan hewl dana ke dest danê şaredarîyanê ma ser. Nê kerdenê wextê derbeyan de benê. Ma dê dest dayişê ser şaredarîyanê xo rê destûr nêdê û ebe şarî ra pîya wayrê şaredarîyanê xo bivejyê. Wa sazgehê xoser bîrê pêrokîn şaredarîyanê ma qontrol bikerê. La nika hadreyînê kayyûmî kenê.”
Tûncel vist vîrî ke eştişê kayyûmî leteyê Planê Qirkerdişîyo û wina dewam kerd: “Dest naroyişê ser şaredarîyanê ma ra cewabê ma do wişk bo. 20 hemşaredarê ma tepişteyê, 30 alwozê ma wezîfe ra amey girewten. Ma îdareyanê xoser ra fek nêverada. Şarî ma rê no wezîfe da, ma zî şarî rê rayverîn kenê. Dûştê nê êrişan ma dê eve hemşaredaran ra pîya 25ê Hezîran de kombîyayiş virazê. Ma dê eve şar û sazgehanê civaka sivîl ra pêdîyayişî virazê.”
Xoverdayiş wezîfeyê ma yo
Hemseroka DBP Sebahat Tûncel aşkere kerd ke dûştê yê ke heta qîyamet ma rê herbî ferz kenê de xoverdayiş wezîfeyê ma yo û wina va: “Ma Serokwezîr, Reîscûmhûr û wezîran îqaz kenê. Ma dê xoverdayişê xo yê demokratîk damûsnê. Veng danime çormeyanê sosyalîst û demokratîk yê Tirkîye. Bêrê ma pîya dûştê faşîzmî de vinderê. Tekoşîn ra xeynî şansekê bîn çinyo. Eke dewlet zextî zana se, ma zî xoverdayişî zanê.Gune partîyê bînî kî bêveng nêmanê.”
No şar bê wayîr nîyo
Tûncel vist vîrî ke weçîntoxî û îradeyê şarî hedefê dewlet de yê û aşkere kerd ke şarî rîwalo ke ma pey înan de vinderê rey day ma. Tûncel va, ma kes qusir nêweyno la no şar bê wayir nîyo. Ma dê dûştê dest dayişê şaredarîyan de her ca de xover bidê. Badê damûstayîn persê rojnamegeran rê cewab ame dayen.
DÎHA/AMED