Weqfê Heqê Merdiman yê Tirkîya (TÎHV) û Komeleya Heqê Merdiman (ÎHD) derheqê pawitoxê heqan yê ke Buyukadaya Stenbolî de bi îdîaya ‘hetkarî dayî rêxistina sîlehin’ ameybî tewqîfkerdiş de, awanîya Merkezê Pêroyî yê ÎHDyî de îzehetêk dayî çapemenîye.
Îzehetê TÎHV û ÎHDyî de Hemserekê Pêroyî yê ÎHDyî Ozgur Turkdogan û Sekreterê Pêroyî yê TÎHVî Metîn Bakkalciyî qisey kerdî û vera tewqîfbîyayîşê pawitoxê heqê merdiman de hêrs û reaksîyonê xo nîşan dayî.
Turkdoganî qiseykerdişê xo de wina va: “Nê 14 rojan de ame dîyayîş ke orte de delîlêk çin o û embazê ma hetkarî nêdayî rêxistina sîlehin. 10 pawitoxê heqan bi hawayo bêhuqûqî ameyî tepiştiş û înan ra 6 kesî ameyî tewqîfkerdiş. Goreyê Vilaweka Pawitoxê Heqê Merdiman ya Miletê Yewbîyayeyî (BM) ganî dewlete heqê merdiman bipawa. Ganî dewlete derheqê kesê ke heqê merdiman îxlal kenî û înan îstîsmar kenî de doze biakera û înan teslîmê edaletî bikera. Tewqîfkerdiş, xebernêdayîşê keyeyê pawitoxê heqan û avûkatan, emnîyet, dozgerî û hakiman ra dîyar beno ke no operasyon operasyonêko plankerde yo. Tewqîfkerdiş yeno manaya bêhurmetî.”
Ganî heqê bêro pawitiş
Bakkalciyî zî qiseykerdişê xo de bale ant pawitişê heq û huqûqê merdiman ser û qiseykerdişê xo wina domna: “Ganî ma heqê merdiman bipawî. Sebebê estena ma pawitişê heqan o. Orte de ne sîleh ne zî sewbîna çî çin o. Heme îdîayî zurî yî. Çîyê ke benê rewşêka îstîsnayî yanî rewşa OHALî de benê. Se beno wa bibo ganî heqê merdiman her şert û mercan de bêro pawitiş. Tîya de çîyêk vera averşîyayîşê nêyî de asteng nîyo.”
DÎHABER/ANQARA