Hepsîyo sîyasî Îrfan Kiliçî roja 3ê Temmuze de, Zîndanê Kandira yê Tîpê Fyî yê Hûmara 2. de merdbi û sere de amebi îdîakerdene ke Kiliço ke qezaya Bongilanî ya Çewlîgî de qeydkerde yo, seba protestokerdişê tecrîdî xo kişto. La goreyê Kiliçî, Kiliç ameyo înfazkerdene.
Birayê Kiliçî yo ke Belçîka de ciwîyeno Sebahattîn Kiliçî va ‘nêdayîşê cenaze, nêkerdişê otopsî û mergê ê ra di rojî dima dayîşê xebere bi keyeyî gumanê înan kerdê zêde’. Sabahattîn Kiliçî da zanayene ke înan heme delîlî wedartî, hayîdarî nêdaye. Kiliçî qumanê xo ardî ziwan û wina va: “Sere de înfaz kerd, di rojî ra dima xebere daye keyeyî, no bi sebebê gumanî. Sere de înan cenaze zî nêramote, dima ra tena seba ke bêro teşhîskerdene, qismê çeneyî ra cor ame ramotene. Raporê otopsî nêda, tena raporê definkerdişî da. Keyeyê ma bêhîsdar nêmend, pîyê mi gama ke cenaze şite, veng da embazanê xo û dîyar kerd ke no înfaz o. Wucûdê ê de şopê derbî estbî, binê çeneyê ê bi cisimêkê birnayoxî amebi qulekerdene. No înfazêko eşkera yo. Vêşayîşî qismêkê linganê ê ra heta cayêk estbî. Înan wina kerdo ke seke Îrfan xo veşnayo, bidî nîşandayene.”
Kiliçî va ‘Ma sey keye, şar û merdimî pey nê hedîseyî veranêdanê’ û qedêna: “Ma vera nê de bêhîsdar nemanenê. Têkoşînê ma yo nikayên seba ke sewbîna Îrfanî nêmirê yo. Eke ma tê nêgêrê, do hîna giranê nê virazîyê. Nika Îrfan merd, ma nêeşkenê ê peyser bîyarê, la qe nêbo ma embazanê bînan ê ke zîndan de yê bipawê. No hêrişêk o ke hemverê ma hemînan de ameyo kerdene. Qetilkerdişê canêk, bi hawayêkê hende bêrehmî, ganî no înan rê nêmano, meşte do Îrfanî bibê zêde.”
ANF/BRUKSEL