ERSÎN ÇAKSU / ŞOREŞ BENEK / ANF / KERKÛK
3 rojî verê artêşa Iraqî û hêzê Heşdî Şabî hêrişê bajarê Kerkûkî kerdî û wextê hêrişî de hêzê asayîşî yê PDK û YNKyî fek meterîsanê xo ra veradaybî û remaybî. Nêyî ser o gerîla, pêşmergeyê ke nêremayî û kesê ke bi hawayo zerrîwaştox sîleh girewtbî û xetêka pawitişî awan kerdbî, labelê seba ke asayîşî yê hêzê PDKyî awanîyê asayîşî teriknayî, na xete zî nêşîna hêrişî bivindarno.
Seke yeno zanayîş 2 rojî verê HPGyî îzehetêkî dabî û seba awankerdişê xeta pawitişî veng dabî. Nê vengdayîşî ser o bi seyan welatîyan herikîyaybî herêma ke tede xeta xopawitişî do bêro awankerdiş. Heto bîn ra bi desan pêşmergeyî zî hetê şar û gerîla de ca girewt. Labelê dima ra pêşmergeyê PDKyî sîlehanê xo yê giranan girewtî û cayê xo teriknayî. Labelê wexto ke cayê xo teriknayî, gule ver bi hewa reşanayî û dîyar kerdî ke Heşdî Şabî dest bi hêrişî kerdo.
Şar vera pêşmergeyê ke cayê xo teriknenî de reaksîyonêko gird nîşan da. Wexto ke pêşmergeyî cayê xo teriknayî, moralê şarî xirab bî û şar va ‘eke ê bi sîlehanê giranan xover nêdanî, ma do senî bi kaleşnîkofêkî xover bidî’. Reyna şar hedîseyê verdayîşê sîlehan ke peymana Cezayîrî ra dima virazîyabî da vîr û va ‘Birayê mi werd nêmend, werd nêmend, înan ma rote’.
Seba ke xoverdayîş nêbî şar terikna
Wexto ke artêşa Iraqî û Heşdî Şabî hêrişê Kerkûkî kerdî, şar ewil nêwaşt ke keyeyanê xo biteriknî, labelê seba ke hetê merkezî ra qerarê xovernêdayîş amebî girewtiş, şar zî mecbûr mend ke koç bikero. Welatîyê ke taxê rojawan û başûrê bajarî de bî, ewil verê xo dayî merkezê bajarî û dima ra zî vera xo dayî rojhelat û vakurê bajarî. Reyna nê welatîyî dima ra vera xo dayî Çemçemal, Teqteq, Hewlêr û Silêmanî.
Tayê zî îxtîmalê qetlîyamêkî ver domananê xo bajar ra vetî û sîleh girewtî, agêrayî bajar. Şar seba ke qerarê xoverdayîşî nêame girewtiş zaf hêrsbîyaye bî. Zafaneyê kurdan taxanê xo teriknayî, labelê ereb û tirkmenî keyeyanê xo nêteriknayî.
Şarê Teqteq û Çemçemalî ameyî welatîyê ke mecbûr mendî ke koç bikerî vera. Teqteq û çemçemalijî vejîyayî rayîran ser û hewl dayî ke şaro ke Kerkûk ra koç kerdo biko meyman û seba nêyî heta şewe ziqaqan de mendî.