Nêzdîyê 100 milyon Lîra mesrefê tesîse şino û na tesîse serra 2017 de temam bena.Xebata Tesîsê eştayo wişk dest pê kerd. Na xebate ra hem navenda şaristan, hem zî 10 qezayê şaristanî îstîfade kenê. Serekîya Daîreyê Pawitiş û Kontrolê Dorûver a ke Şaredarîya Şaristano Gird no sazî, Tesîse dewa Sevîndîk ya Çinarî de yena ronayîş.
Tesîso zaf awayî
Pê viraştişê na tesîse problemê eştayo wişk ê Şaredarîya Şaristano Gird a Amedî, Şaredarîya Rezan, Yenîşehîr, Peyas, Sûr, Pîran, Gêl, Erxenî, Bismil, Henê û Çinar safî beno. Proje do serra 2017 de biqedîyo. Çarçiwaya xebate de cayê depo, tesîsêke kompostî yo ke 15000 ton gêno, tesîsêkê awguznayîşî yo ke awe rijneno, tesîsêkê eştayê tibî, tesîsêkê ambalajê eştayo wişk, 4 sazgehê neqilkerdişî, 4 depokerdişê eştayo wişk mîyanê na tesîse de yenê viraştiş. 34 milyon û 46 henzar Euro mesrefê no projeyî şino (nêzdî 100 milyon lîre). Fînansmanê aye ra se ra 77,22’ê ci (26.291.985 Euro) hetê hîbeyê Yewîtîya Ewropa, se ra 9,11’ê ci (3.101.701 Euro) fonê Wezaretê Dorûver û Bajarvanî û se ra 13.67’ê ci (4.652.552 Euro) hetê Şaredarîya Şaristano Gird û şaredarîyê qezayan yeno dayîş.
Problemê safî benî
Serekê Daîreyê Pawitiş û Kontrolê Dorûver Denîz Kiraç derheqê xebatan de malumat da û îzeh kerd ke tebaxa 2015 de xebatê înşaatî dest pê kerdî û wina vat: “Heta adara 2017 xebata înşaatî qedîyena. Çarçiweya proje de ma dima ra cayê depokerdişî sero xebate kenê. Cayo ke ma virazenê de tesîsêkê awguznayîşî, tesîsêkê kompostî yenê ronayîş û semedê peydakerdişê enerjiya elektrîkî zî uniteyî yenê ronayîş. Emrê no cayî 30 serr o. No tesîs do 30 serre xizmet bido şaristan. 30 serran ra dima do projeyê newe bierzîyê dewre.”
Kiraçî qalîkerdişê xo de îzeh kerd ke Erxanî de cayê depokerdişê eştayo wişk yeno viraştiş û wina domna: “Ma mabênê Gêl û Pîran de zî bazgehê neqilkerdişî virazenê. No bazgeh neqilkerdiş de feydeyêko pîl virazeno.”
AMED