Dewleta dekker a tirk bi heme hêrişê xo yê dijberê merdimî, verba şarê kurd û sazîyê komelî hêrişê qirkerdişî daya destpêkerdiş. Çarçiweya no konseptê şerî, Walîyîya Amedî dest eşt sazî û meclîsê şarî. Serdozgerê Komare yê Amedî 11’ê gulane de bira girewtişê 17 komeleyê hemwelatijî yê azad û zeypê da. Mîyanê nê sazîyan de Meclîsê Şarî yê taxa Îskenderpaşayî yê Sûrî zî esto. Ame resnayîş ke do nê sazî bêrî rijnayîş û cayê înan de zî do nuqteyê polîsî bêrî viraştiş.
Meclîsê taxe
Babete ser o hemserekê Meclîsê Şarî yê taxa Îskenderpaşayî Cengîz Ekîncî derheqê bira girewtişê meclîsan û ‘nuqteyê polîsan’ ser o qise kerd. Ekîncî dîyar kerd ke verê meclîsê taxe bêrî awankerdiş, Sûr de têmîyanîyanîyake gird estbî û wina dewam kerd: “Sûr bibî cayê fuhiş, tiryak û dizdeyî la peynîya meclîsê taxan ameyî awankerdiş, pêroyî nê lêminî ameyî pakkerdiş. Şar bi her awayî problemê xo çareser kerdî la bi girewtişê nê meclîsan şar do hewna nê lêminî dest pê bikerî.”
Ekîncî da zanayîş ke peynîya awankerdişê meclîsan, şar problemê xo ra çareserî vînayî û wina vat: “Problemêk mîyanê şarî de bibî, ya zî xemginîya şarê xo, ma mîyanê xo de demêko zaf bi kilm de çareser kerdînî la sazîyê dewlete de problemêko tewr şenik zî bi serran nîno çareserkerdiş, no ser zî êdî bawerîya şarî sazîyê dewlete ra çîn a.”
Wa sazîyê xo bipawî
Ekîncî destnîşan kerd ke bi hêrişê hêzê dewlete ra zaf sazîyê înan ameyî rijnayîş û bal ant bira milkêdewletekerdişî ser o û aşkera kerd ke binê nameyê bira milkêdewletekerdişî de sazî û meclîsê şarî yenî dekkerdiş û cayê înan nuqteyê polîsî yenî awankerdiş. Ekîncî veng da pêroyî şarê kurdî ke wa destûr nêdî ke sazîyê şarî bêrî dekkerdiş.
DÎHA/AMED