Dewleta tirk 24ê temuze 2015 de hetêk ra hêrişê Warê Pawitişê yê Medya kerde heto bîn ra zî hêrişê Xoserîya Demokratîke ke hetê şarî ra ameybî îlankerdiş, kerde. Sere de ciwanê kurdî yê YPSyî û heme şar vera herişanê îmhakerdişî de xover da.Dewleta tirk her çiqas ke bi teknîkêko gird hêriş kerdêne zî vera îradeya şarê kurdî de zaîyatêko gird da. Fermandarê YPSyî Şîyar Botanî serrgêra 1. ya awanbîyayîşê YPSyî de qisey kerd.
Fermandarê YPSyî Botanî va ‘heqê her şarî est o ke xo bi xo îdare bikero û pawitişê xo bikero’ û wina domna: “Dewleta tirk bi serran polîtîkayê zulm, zext û dagîrkerî ser şarê kurd de meşnaye. Êdî şarê ma waştêne ke nê hêrişan bivindarno û xo bi xo îdare bikero. Na çarçewa de xoserîya xo îlan kerd. Bi îlankerdişê xoserîya demokratîke hêrişê dewleta tirk zî dest pêkerd. Dewleta tirk sere de Gimgim, Sûr û Cizîr û sewbîna cayê ke xoserî tede ame îlankerdiş, hêrişê ê cayan kerde. Cizîr de 200 ra zêde kesî bi hawayo ganî veşnaye û wehşetêko gird meşna. Wehşeto ke ame kerdiş yê Hîtler û Mussolînî ra derbaz kerd. Dewleta tirk nê wehşetî çapemenî de sey serkewtişêko gird nîşan daye û waşte ke psîkolojîyê tersî bi heme şaran bida cuyayîş. Şaro ke Helebçe, Zîlan û Dêrsimî xo vîra nêkerdo, nê wehşetî zî xo vîra nêkeno.”
Bebeko 3 aşmî qetil kerdî
Botanî qiseykerdişê xo de va ‘xoverdayîşê YPS û şarê kurdî vera zêdebîyayîşê hêrişê dewleta tirk de her ke şî zêde bî’ û wina va: “Xoverdayîş sifteyîn bi barîkat û xendekan dest pêkerd. Mi bi xo zî mîyanê xoverdayîşî de ca girewt. Ma nêwaştêne xoverdayîşo sîlehin dest pêbikero. Labelê vera nê hêrişan de ma mecbûr mendî. Kişta ma de bebeko 3 aşmî û merdimê extîyarî rasteyê ziqaqan de, beran ver de ameyî qetilkerdiş û dima ra xoverdayîş dest pêkerd.”
Şarê Şirnexî va nê
Botanî qiseykerdişê xo de bale ant xoverdayîşê Şirnexî ser û wina va: “Badê ke Haci Lokman Bîrlîk ame qetilkerdiş ra dima Şirnex de xoverdayîş dest pêkerd. Şarê Şirnexî heta nika qet koletî û teslîmbîyayîşî qebul nêkerdo. Dewleta tirk Cizîr û Sûr ra dima hêrişê Şirnexî zî kerde û Haci Lokman Bîrlîko ke welatperwerêk kurd bî qetil kerde û bi wesayît erdî ra kirantî. Ciwanê Şirnexî nêyî qebul nêkerdî û bi barîkat û xendekan waştî vera nê hêrişan de bivinderî. Ciwanan bi no hawa 82 rojan xover da û xoverdayîş vilayê heme bajaran bî. Çeteyê AKPyî tîya de zaîyatêko gird dayî.
Artêşa tirk tersî cuyaye
Botanî dîyar kerd ke artêşa tirk psîkolojîya tersî cuyaye û wina va: “Xoverdayîşê embazê Murat, Xwînda, Hîzan, Gever û Zeryan şarî ser de tesîrêko gird kerd. Bitaybetî xoverdayîşê embazê Muratî bi xo şînayêne hêrişanê dişmenî bivindarno. Dişmenî qet nêşîna meterîso ke embazê Murat tede bî, têk bîşêro. Xoverdayîşê ci zaf zorî dayêne dişmenî û no heta şehadetê embazî dewam kerd. Her vîsta xoverdayîşî de qehremanîyêka girde ame cuyayîş.”
Şarê ma sere nêroneno
Botanî peynîya qiseykerdişê xo de wina va: “Zaf cayanê Kurdistanî ra ciwanî ameyî beşdarê xoverdayîşê Şirnexî bîyî. Mîyanê nê xoverdayîşî de qehremanîyê girdî ameyî nîşandayîş. Ma do nê xoverdayîş û qehremanîyan xo vîra nêkerî. Ma do têkoşînê înan gird bikerî. Şarê ma zî nê qehremanan do xo vîra nêkero û rayîrê înan de bimeşo. Ez şexsê embazan de heme şehîdan bi hurmet yad kena û Serrgêra 1. ya awanbîyayîşê YPSyî pîroz kena.”
Nisêbîn de sendromêk cuyayî
Botanî va ‘Dewleta tirk Cizîr ra dima eynî hawa hêrişê bajaranê bînan zî kerde’ û wina dewam kerd: “Bitaybetî Nisêbîn seba dewleta tirk bî sendromêk. Dewleta tirk bi tanq, top û heme teknîkê xo waşte bi dormegirewtişê şarê Sûrî, hemînan qir bikero. Sêvê, Fatma, Mehmet Tunç, Axîne, Pakîze, Çîyager û Çekoyî vera nê hêrişan de sere nêronayî û xoverdayîşêko gird nîşan dayî. Na qehremanîya înan her kesî rê bîye finak. Eynî hawa Nisêbîn de zî xoverdayîşêko gird ame nîşandayîş. Bi rayberîya embazê Xebatkarî de ruhêko fedaî vejîya orte. Her çiqas ke dewleta tirk bi îmkananê girdan hêriş kerde zî nêşînaye gamêk daxî bi ciwanan tepîya bida eştiş.”