Dewleta Îranê ya li dijî PKK û PJAK’ê dest bi operasyon û êrişên leşkerî kiriye, hat zanîn ku di nava xaka Başûrê Kurdistanê de, ligel qereqolan, kelehan jî ava dike. Kelehên ku heta niha ji aliyê artêşa Îranê ve hatine avakirin, êdî ji aliyê her kesê ve tên dîtin, riyên ku qereqolan bi hev ve girêdidin, di nava xaka Başûrê Kurdistanê re derbas dibin. 
Îranê beriya sê salan dest bi avakirina van kelehên ku wê li hemberî gerîlayan bi kar bîne, kiribû. Îranê li ser riya ku ber bi Qendîlê ve diçe heta niha nêzî 9 keleh ava kiriye, avakirina kelehan dehemîn jî didome.
Li gor çavkaniyên herêmî, hat diyarkirin ku hinek ji kelehên leşkerî yên ji aliyê artêşa Îranê ve li ser sînor tên avakirin, di nava xaka Başûrê Kurdistanê de tên avakirin. Hinek ji van kelehan li deverên Berde Qeleşte û Pirelokê tên avakirin, hat zanîn ku avakirina keleha li Berqelşteyê didome.
Hat zanîn ku artêşa Îranê li navçeya Çomana li ser sînorê Rojhilatê Kurdistanê (Îran) 3 kelehên mezin li ser girên bilind û stratejîk ên herêma Dolê ava kirine. Her wiha hat zanîn ku li deverên Bozî Merkesîr û Pîrelokê ligel kelehên leşkerî, riyên nû jî tên çêkirin. Hat gotin ku stûnên ceyranê jî hatine danîn. Tê payîn ku artêşa Îranê piştî qedandina van kelehan jimareke zêde ya li leşkera di kelehan de bi cî bike.

Cebar Yawer înkar kir!

Berdevk û Sekreterê Wezareta Pêşmerge ya Herêma Kurdistanê Cebar Yawer nûçeya ‘artêşa Îranê di nav axa Herêma Kurdistanê de kelahên leşkerî çêdike’ derew derxist. Cebar Yawer di vê mijarê de got, “Heta niha çi aliyekî têkildar yê leşkerî ev nûçe piştrast nekiriye. Ev nûçeyên ku hatine belavkirin li ser esasa gotinên muxtar an welatiyên navçeyê hatine çêkirin. Lê nabe mijarên bi vî rengî tenê pişt bi zanyariyên kesên asayî girêbide.”


ANF/AKnews



Pasdaran nekarîn sînorê derbas bikin


Êrîşên rejima Îranê yên li dijî xaka Başûrê Kurdistanê di roja 19’mîn de berdewam dike. Heya niha hemû hewildanên artêşa Îranê yên ji bo derbazkirina sînor ji aliyê Hêzên Rojhilatê Kurdistanê HRK’ê ya girêdayî PJAK’ê ve hatin vegerandin. Roja Sêşemê di demjimêrên nîvro de leşkerên Îranê di herêma Berdenazê re xwestin sînor derbaz bikin, lê belê li rastî berxwedana gêrîla hatin û neçar man paşde bizivirin.Li heman herêmê û di demjimêrên siharê de leşkerên Îranê bi dozeran xwest rê çêbikin û berbi sînorê Başûrê Kurdistanê ve werin, komek ya gêrîla di demjimêr 09.30’an de çalakiyek li hember leşkerên Îranê pêkanîn. Di şerên ku çêbûyîn de nehat zanîn ka mirî yan birîndar çêbûne.

QENDÎL



Îranê zarokê 15 salî kuşt

Pêr hêzên Komara Îslamî yên Îranê zarokekî kolber li bajarokê Konewirç kuşt û termê wî avêt nav axa Herêma Kurdistanê.
Jêderekê ragehand ku ji kuştina zarokê kolber, hêzên ewlehiya Germik û û Pêcewênê hatine agahdarkirin û piştre jî hatiye zanîn ku ew Kurdê Rojhilat e, navê wî Arman Fayeq Elî ye û temenê wî 15 sal e.
Arman ku ji Merîwanê ye û karê qaçaxtiyê li sînor dikir, piştî ku hatiye naskirin ew di riya dergeha sînorî ya Başmaxê re radestî xwedanan kirine.

Tê zanîn ku gelek ji Kurdên ser sînor ji ber rewşa wan ya hejar, karê qaçaxtiyê dikin û ji ber wê jî gelek kes dibin qurbanî.

PUKmedia