Îranî da zanayene ke seba cewabdayîşê kiştişê Qasim Silêmanîyî înan hêrişê baregehêkê hewayî yê Amerîka yê Iraqî kerd.
Hêriş nîmeyê şewe de vera beragehê hewayî yê Eyn El Esadî yê rojawanê Iraqî de ame kerdene. Yeno vatene ke hêrişê fuzeyan de tewr tay 10 fuzeyî ameyî eştene baregehî.
Xebera televîzyonê dewlete yê Îranî de ame parekerdene ke hêrişê vera baregehî cewabê kiştişê Qasim Silêmanîyî yo. Xebere de ke zanayîşê ci selahîyetdaranê Îranî ra ameyî girewtene gef ame wendene ke Îran do vera hêrişê biîhtîmalî yê DYA cewabanê hînî xurtêran do bidê.
Serekê DYA Donald Trumpî zî derheqê hêrişî de eşkerayîyêke daye û vat ke hayîya înan pê hêrişî esta û ê rewşe nêzdîye ra teqîb kenê.
Vervatoxa Trumpî Stephanîe Grîsham zî îfade kerd ke Serekê DYA hêrişî ra dima şêwirmendanê xo yê asayîşê neteweyî reyde kombîyayîş kerd.
Ruhanî û Hamaneyî ra eşkerayîya verêne
Serekkomarê Îranî Hasan Ruhanî û rayberê dînî yê Îranî Ayetullah Hamaneyî hêrişê vera baregehê DYA ra dima eşkerayîya verêne kerde.
Goreyê Serekkomarê Îranî Hasan Ruhanîyî amerîkayîjan beno ke ‘’perrê Silêmanîyî’’ pakerdî la Îran do bi pakerdişê lînganê DYA yê herême cewab bido.
Rayberê dînî yê Îranî Hamaneyî îfade kerd ke înan lapatêk eşt DYA. Hameneyî ard ziwan ke estbîyayîşê Amerîka yê herême beno semedê bênîzamîyan û waşt ke DYa herême biterikna. Hamaneyî vat: “Dişmenî DYA, Îsraîl û sîstemê înan o qure yê.
Hamaneyî bi sîstemê qureyî nîşanê rojawanê dinya da û vist vîrî ke Îran pabesteyê bernameyê nukleerî yo û caverdişê nê bernameyî do verê rayîrê bandurîya Amerîka abikero.
Dima ke Îranî bi fuzeyan hêrişê baregehanê DYA yê Iraqî, Tehran de şarî nê herîşî bi coşî fîraz kerdî. Serê sibayî ra dima zaf kesî bi alayanê Îranî û portreyê Qasim Silêmanîyî vejîyayî meydanan.
MERKEZÊ XEBERAN