Gerîlaya YJA Starî Ekîn Wan ke bi işkence amey qetilkerdiş ra dima Edene de cenîya bi nameyê Fîgen Şahîn hetê polîsan ra ameybî binçimkerdiş û weyra de hemverê ya teda û îşkence ame şuxulnayîş.
Babet sero Pawitoxa bi zerreyî ya Platforma Ma do Cînayetê Cenîyan Bivindarnî Îpek Bozkurt ard ziwan ke no çarçiweya Dadgeha Ceza ya Mîyannetewî de sucê şerî yo.
Bozkurt dergeyîya qalîkerdişê xo de ciresna ke no sucê merdimantî yo û lazim o ke verpersîyar bêrî dadgehkerdiş û wina domna: “Bi taybetî weçînayîşê 7’ê hezîranî ra dima semeda îqtîdar encamî ra qayîl nêbi bombe eşt mîyanê komelî. Semeda nêy ra konsepta şerî day destpêkerdiş. No şer ewil zirar dano doman û cenîyan. Bi taybetî zî laşê cenîyan sey tirs yeno xebetnayîş.”
Bozkurt qalîkerdişê xo de wina vat: “Çarçiweya Dadgeha Ceza ya Mîyannetewî de tay sucê şerî estîy. Goreyê nêy kolekerdiş, tecawiz û tedakerdişê cenîyan mîyanê sucê şerî de yeno nîşandayîş. Vilabîyîşê fotografê rut ya Ekîn Wanî sucê şerî yo. Têkoşîna cenîyan nêy pancês serranê peynîyan de xeylê rayîr girewt. Semeda vernîya nêy bêro girewtiş lazim o cenî bêrî têhet.”
Her tim aştî wazenîy
Bozkurt qalîkerdişê xo wina peynî kerd: “Her tim cenî dijî hêrişanê lejker û polîsan vindênî. No vindetiş zî semeda ke maya yewî yî ney, semeda ke wa domanê nêy komelî nêmirî no xoverdayîşî nîşan danîy. Ma sey tevgera cenî bi şer ney bi famkerdiş, qalîkerdiş û qebulkerdişê cîyayan aştî wazenî û ma bawer kenî ke encax bi no hawa ma eşkenî şer vero bivinderî.”
JINHA/STENBOL