Goreyê raporê betalî û îstîhdamî yê DÎSK-Arî yê 2016î, betalîya cinîyan resa se ra 15.1, betalîya cinîyê ciwanan zî resa se ra 25.1î. Goreyê raporî betalîya cinîyan 2 puan, teberê zîretî de betalîya cinîyan 2.3 puan zêde bîya. Aşma tebaxe ya 2016 de betalîya cinîyê ciwanan 1.6 puan zêde bîya û resaya 19.9î. Bi no hawa aşma tebaxe de betalîya tewr girde cinîyanê ciwanan de ameye dîyayîş. Pêro pîya hûmara betalan resa 3 mîlyon 493 hezar kesî. Nînan ra 2 mîlyon û 2 hezar kesî camêrd î, 1 mîlyon 491 hezarî zî cinî yî. Babete ser o Sekretera Huqûqî ya KESKî Fatma Çetîntaşe qisey kerde.
Polîtîkayê cînsîyetperestî yê AKP
Çetîntaşe va ‘betalîya cinîyan de tesîrê polîtîkayanê îqtîdarî zêde yo’ û wina domnaye: “Polîtîkayê cînsîyetperestî yê AKPyî no zêdebîyayîş de xeylê bitesîr o. AKP verfekê aqlê dewlete yê camêrdî yo û polîtîkayanê nê zîhnîyetî meşneno. Paketê ke sey mizgînî ame pêşkêşkerdiş zî seba rayapêroyî ra tasfîyekerdişê cinîyan esas gêno.” Çetîntaşe peynî de vist vîrî ke zey kedkarî ê seba karêko biewle, ameyoxêka biewle û seba cuyêka merdimîye iyê dê vajî nê.
ANQARA