Destdergî, ya zî bi vatişê bîn tecawuz raybazekê sîstemê serdestan o. Destdergî sereştişekê îdeolojîk û polîtîk o. Hikumdarî serva ramitişê îxtidar û serdestîya xo destdergî kar anê. Çimeyê kulturê destdergî îxtidarî ra piya, cinsîyetperwerî yê civakî yo. Çike na îdeolojî dewlet ra bi sînor nêmanena xo vilayê pêrokîn civakî kena.
Hikûmeta AKP jû îxtidara ke dişmenê ceniyan, dişmenê domanan, dişmenê şaran û yê serbestî ya. Na îxtidara ke serdestiya camêrdan ser de roniya, nika hewl dana xo açarno jû sîstem.
Demê AKP de kulturê destdergî zey sîstematîk vila û rewa bi. Zihnîyet û polîtîkayê AKP ke kolekerdişê cenî û civakî ferz kenê, zey qetilkerdiş û îstismarê cinsî açarniyeno kuçe, keye û her cayî. Ma na dewlet ‘Pozantı‘ ra silasnenê. Dawa N.Ç ra silasnenê, Özgecan Aslan ra silasnenê. Her roj qewimyayişê cînayetanê ceniyan ra silasnenê. Na îxtidar camêrdanê sûcdar nê, mexdûrê ke yenê kiştiş û raştê tecawuzî yenê sûcdar kena. Çend reynî vatî ‘cenî tehrîk kenê, ‘çima kuçeyan de huwenê’, çima kincê akerdî kenê xo’, ûsb. Îxtidara AKP û Erdogan’î bi serrano hewl danê ke cenî, camêrd û civakî newe ra dîzayn bikerê. Hewl danê civakî biancê sînoranê koletî. Çike ceniya ke, ferdo ke, civakê ke azad niyê, îdarekerdişê înan hona rehet o.
Erdogan û AKP xo zey ‘merde’ yê şarî, şarî zî zey ‘cenî’ ya koledara xo vînenê. Cok ra vera civaka bi exlaq û polîtîk hewl danê civakeke dejenere, îrade şikitî û pûç înşa bikerê. Civaka Tirkiye de camêrdê ke Erdogan’î xo rê zey profîl gênê, biyê zey ‘Erdogan’ê werdî (qijkek). Nê prototîpê werdî yê Erdoganî vera ceniyan binlingkerdişê her heqî xo de vînenê. Eke jew camêrd jû cenî kişeno se, eke her roj bi seyan cenî keyeyê xo de raştê şîdet yenê se, no bi zihnîyetê Erdogan û AKP ra girêdayî yo. Çike AKP cenî zey ‘însan’ nê, zey ‘xîzmetkara’ camêrdan, zey makîneya ardişê domanan vînena. Xora sazgehê dînî, yê hiqûqî, yê perwerde pêrokînî xîzmetê îdeolojiya destdergî yê Erdogan’î kenê. ‘Alimê dînî’ fetwa danê û ensest, ya zî tecawuz rewa kenê. Hiqûqa Tirkiye zî goreyê îdeolojiya camêrdîn hereket kena. Tecawuzkaran rê, kiştoxan rê ceza nêdana, ser dosyeyan niminena û serbest viradena. Rîwalê ke Tirkiye de tecawuzkarî nînê cezakerdiş, biyayişê destdergî zî benê vêşî. Xo ra sazgehanê perwerde de her roj tacîz û tecawuzî cuwyenê.
Tirkiye de endî weşiya qeçikan (domanan) zî bin taloke de ya. Nimûneyê ney ê peynî zî Karaman de qewimiya. Jû sazgeha perwerde yê dewlet (Weqfa Ensar) de 45 qeçekî raştê tecawuzî amey. Hendê na qewimyayiş, vatiş û polîtîkayê sermiyananê hukumet yê vera biyayiş hewna vêşî giranî bî. AKP wayrê tecawuzkaran vejya û biyayiş rewa damusna. 100 ra vêşî weqif, komel û sazgehan ser sosyal medya de kampanyaya ‘Ma pêrokînî Ensar’ê ramitî û hurendiya domanan wayrê êrişkaran vejyayî.
Reyna cayo ke Wezîra Polîtîkayê Komel û Malbatî Sema Ramazanoglû qiyametî biqerfno û desinde fermanê tepiştiş û cezakerdişê tecawuzkaran bido, wayrê tecawuzkaran vejya û va, ‘jû finî de teba nêbeno’. Nê vatişî qeneat û fikrê Ramazanoglû yê şexsî nîyê. Stratejî û polîtîkayê îdeolojiya destdergî yê. Ez qe behsê vatişanê derheqê ‘kulturê haremî’ yê ‘Emîne Xanim’ nêkena. La na cenike niyetê raşt yê AKP aşkere kerd. Çike AKP wazena pêrokîn welatî açarno harem. Nê numuneyî pêrokînî leteyê tabloyê piyayî yê û êrişê îdeolojîk û polîtîk ê.
Zey ke cenî keyeyê xo de, kuçeyan de, cayê karî de taloke de yê, endî domanî zî mekteban de, kuçeyan de bin taloke de yê. Çike Tirkiye de îstismarê cinsî, şîdet û kiştişê doman û ceniyan rewa yo, cezayê ci çinyo. Çewlig de zî veriya çend rojan vejya teber ke, jew lajeko 16 serre, 3 serriyo bi tehdît û şantajan raştê îstismarê çend kesan yeno. La tiya de zî tecawuzkaran ceza nêgirot. Her roj çapemenîya Tirk de çend xeberê destdergî û kiştişê ceniyan bi şiklê magazîn ca gênê. Çi qe destê Erdogan û AKP yeno, hewl danê ke civakî hetê exlaqî û polîtîk pûç bikerê. çike jew civako ke wayrê zonayişê exlaq û polîtîk niyo nêşkeno azad bibo. Cok ra ganî ma vera na rejîma tecawuzkar veng û tekoşînê xo berz bikerê, civakekê bi polîtîk û exlaq înşa bikerê.